Emîne Şenyaşara ke di laj û mêrdeyê ci hetê merdimanê Wekîlê AKPyî yê verênî ra ameybî qetilkerdene, verê Meclîsî de çalakîya Nobeta Edaletî rê dewam kena.

Emîne Şenyaşar vizêr verê çalakîya xo waşt şiro bînaya Grûba DEM Partî la polîsanê meclîsî destûr nêda. Emine Şenyaşar seba ke verê ci ame girewtene nêrazîbîyayîş mojna û cayo ke verê ci ame girewtene, tîya de  çalakîya roniştişî kerde. Emîne Şenyaşar tîya lawikî vatî û qala qirkerdişî û prosesî kerd, rewşa Şenyaşare nişa xirabe bîye.

Xebatkaranê weşîye ambulans de Emîne Şenyaşar rê mudaxeleyo verên kerd. Dima a wedarîyaye Nêweşxaneyê Meclîsî û EKG yê ci ame kerdene. 

Tîya ra zî Emîne Şenyaşar sewqê Nêweşxaneyê Guvenî bi. Tîya de ame tesbîtkerdene ke tansîyonê ci berz bîyo, aye krîzê sînîrî derbaz kerdo û hebê tansîyonî dîyayê ci. Emîne Şenyaşar tedawî ra dima erşawîyaye keyeyê xo.