Heyetê Haştîye yê Seba Pawitişê Kurdîstanî yo ke 7 kesan ra yeno pê, vera hêrişanê îşxalî yê dewleta tirke Başûr de pêvînayîşanê xo rê dewam keno.

Heyet de Serekê Komelê Îslamî yê Kurdîstanî (CÎK) Hafiz Ahmet Turhalli, Prof. Dr. Salar Basîra, Sereka Yewîya Doktoran a Kurdan Zeynepe Bînîcî, şêwirmende û aktîvîste Ronake Azîz, Weqfa Linangan a Holanda ra hunermende Gloriosu Jun Saturay, Vervatoxê Enternasyonelê Averî Daniel Kopp û Çimdaro Sîyasî Yilmaz Pêşkevin Kaba cagênê. Heyetî Parlamentoyê Başûrê Kurdîstanî de komanê Kongreya Starî, PYD, PADÊ, HDP, YNK, PDK û Tevgera Goranî de pêvînayîşî kerd.

Jun Saturay, Daniel Kopp û Hafiz Ahmet Turhalliyî derheqê pêvînayîşanê înan de ANFyî rê qisey kerd.

Jun Saturayî ard ziwan ke o filîpînij o û seba asayîşê koçberanê herême tewrê nê pêvînayîşan beno. Saturayî vat: ''Ez seba paştdayîşê şarê kurdî zî ameya tîya. Çunke menfatê ma û ê kurdan yew ê. Na herême de zaf filîpînijî est ê. Asayîş û qederê ma pabesteyê wayûbirayanê ma yê kurdan ê. Ez venga pêro komelê mîyanneteweyî dana ke paştî bido kurdan.'' 

Daniel Koppî dîyar kerd ke dewleta tirke seba ke hêrişanê xo meşrû bikera NATOyî şuxilnena û vat: ''Ez seba azadî, haştîya şaranê dinya û bindestan tewrê nê heyetî bîya. Dewleta tirke erdê Başûrê Kurdîstanî îşxal kena. Ma îşxalê Başûrî û tedayanê vera sîyasetmedaranê Vakurê Kurdîstanî ra qerqilîyenê. Dewleta tirke endamîya NATOyî şuxilnena û hêrişanê xo kena meşrû. Ganî vera ney  xoverdayîşê ma bivurîyo xoverdayîşêkê mîyanneteweyî. Ma tîya de partîyan û rêxistinan de pêvînayîş kerd. Wexto ke ma agêrayî zî pêvînayîşê ma do dewam bikerê.''

Serekê CÎKî Hafiz Ahmet Turhalliyî vat: ''Rojdemê ma yê verênî hêrişê îşxalî, yewîya kurdan ê. Pêvînayîşan de her kesî vat ke ê vera nê hêrişan ê la tewirê înan vera hêrişan hende bihêz nîyê. Hetê bînî ra ma pêvînayîşê bi HDPyî de dî ke PDK tedaya HDPyî keno. Ma pêvînayîşê bi Neteweyanê Yewbîyayeyan de hêrişê kîmyewîyî ardî rojdem, kerdişê vera koçberanê Vakurê Kurdîstanî pare kerdî. Ma do pêvînayîşanê xo rê dewam bikerê.''