Parlamenterê HDP'yî yê Colemêrgî Saît Dedeyî, dimayê kiştişê Şenî şahîdan û dewijan reyde pêvînayîş kerd û derheqê serebutî de eşkerayîyêka nuştekîye weşanaye.

Dedeyî da zanayene ke, Sertîp Şen wareyê Kavleboşî yê Dewa Wargenîma de, cayo ke qereqol û qerargehê eskerîye esto de bi guleyî sêneyê xo ra ameyo pirodayene û no rî ra cuya xo vîndî kerda. Goreyê Dedeyî, Şen roja serebutî de teba hemsera xo nîzamîyeya qereqolê Çobanpinarî ra seba çerênayîşê pesê xo destûr girewt û dimayo ke nasnameyê ci ame kontrolkerdene derbazê wareyî bi.

Nêverda ambulanse bêra

Dedeyî vat, “Danê perojî hemsera ey û cinîyê bînî seba arêdayîşê pincaran cayê çerênayîşê pesan ra şîyî û wexto ke agêrayî zî dî ke Sertîp Şen birîndar o. Hemwelatijê ke ameyê cayê serebutî venga ambulanse dayo, labelê qerargehê eskerîye wexto ke dîyo amulanse yena, rîyê asayîşî ra destûr nêdayo ambulanse ke ambulanse şora cayê serebutî. Naye ser o hemwelatijan bi îmkananê xo birîndar berdo resnayo ambulanse. Labelê seba ke ambulanse saetêk nême cayê serebutî ra dûrî bîya, erey kewtê. Çi heyf ke seba ke mudaxeleyo hewca wext de nêameyo kerdene, Şen rîyê gonîvîndîkerdişî ra cuya xo vîndî kerda.”

Dedeyî da zanayene ke, cayo ke Sertîp Şen ameyo kiştene zî , qerargehê eskerîye yê Çîmenlî, qerargehê eskerîye yê Çobanpinar û qerargehê eskerîye yê Asteng Lîder Tepeyî yê ke girêdayîyê tabûrê Geverî yê bî. Dedeyî vat, “Herême hetê 3 qerargehan ra yena ewnîyayene û cayo ke serebut qewemîyayo bi çiman zî yeno dîyayene. Şahîdan vat, Sertîp Şen bi guleyêko qerargehê eskerîye yê Çîmenlî yo ke 3 kîlometre dûrî yo ra ameyo eştene cuya xo vîndî kerda.” Dedeyî da zanayene ke, seba cezadayîşê qetilkeran ê do cipersayîşî teqîp bikerê.