Vakurê Kurdîstanî û Tirkîya de krîzo ekonomîk her ke şino giranêr beno. Sebebo verên ê nê krîzî polîtîkayê şerî yê îqtîdarê AKP-MHPyî. Esnafanê Êlihî krîzê ekonomîkî ser o ANFyî rê qisey kerd.

Esnafê bi nameyê Abdulhalîm Urakî vat: ''Bazar de her çi beno vayêr. Ma pê deynan berhem gênê û roşenê. Sebebo verên ê nê krîzî hukmat o. Şar zî vayan ra nêeşkeno çîyêk bihêrîno. Ez nêeşkena kîraya xo zî bida.''

Yuksel Yildizo ke 4 serrî yo firinê nanî îdare keno vat: ''Erdê Kurdîstanî her hetî ra zengîn o la ewro polîtîkayanê şaşan ra şar beno xizan. Sebebê nê krîzî dewlet a. Êlih de se ra 80 esnafî nêeşkenê sifteh bikerê. Ma firin de eşkenê têna pereyê awe û ceyranî qezenç bikerê. Eke wina dewam bikero ez do firinê xo biqefilna.''  

Esnaf Adnan Yilmazî vat: ''Ma deyndar ê û nêeşkenê kîraya xo bidê. Polîtîkayanê dewlete ra şar bîyo xizan. Esnafê qijkekî yew bi yew dikanê xo qefilnenê.''

Esnaf Abdulkerîm Canî vat: ''Dikanî serê sibayî ra heta şanî veng ê. Qaşo dikanî akerde yê la a raşte girewte yê. Kîraya dikane 8000 hezar a. Ma nêeşkenê kîra bidê û heqê faturayan ra bêrê.''

Esnaf Ferhen Turanî vat: ''Her ke şino karê ma beno xirabêr û hînî ma nêeşkenê kiloyêke goşt zî biroşê. Hemwelatîyî krîzî ra cara nêeşkenê çîyêk bihêrînê. Her ca de kar vinderto.''