Semtê Dîclekentî yê Amedî de tewr tay 150 dikan û kargehî estê. La esnafî verê îflasî de yê. Hetêkî ra janê Korona hetêkê bînî ra krîzo ekonomîk; esnafê Amedî mîyanê tengasîyêka pîle de yê. Semedo ke dikanî Korona ra qefilîyayî bi seyan karkerî zî bêkar mendî.

Sezer Tugrulo ke 15 serrî yo Dîclekent de salona ci ya arayî esta ano ziwan ke pandemî ra 8 mengan ra nata kargehê ci girewte yo û 15 xebatkarê ci zî karî ra vejîyayî.

Tugrulî vat: ''Dewlete destek nêdana ma. Embazê ma nêeşkenê faturayanê xo bidê. Dikanê mi girewte yo la ez hema zî kîra dana. Dewlete heqê awe û ceyranî zî wazena. Eke rewşe wina dewam bikera ez do dikana xo binî ra biqefilna. Her kes wina perîşan bîyo.''

Cafer Tayinlamak zî Dîclekent de kafeyê ey esto û o zî hînî nêeşkeno debarê xo bikero. Tayinlamakî vat: ''Mi neçarîye ra 13 xebatkarê xo karî ra vetî. Ma heta ewro destekêk zî nêgirewt. Esnafan rê ganî paştî bêra dayene.''

Adem Deger zî wayîrê lokanta yo û ey zî prosesê pandemî de 25 xebatkarê xo karî ra vetî. Degerî vat: ''Ganî ma rê hetkarîya kîra û masrafan bêra kerdene. Zengînî benê hîna zengîn xizanî zî hînî benê xizan. Dewlete têna zengînan rê hetkarîye kena.''

Mehmet Altunbay zî Dîclekent de wayîrê dikana datlîyan o. Altunbayî vat: ''Ez şermî ra nêeşkena biewna rîyê xebatkaranê xo. Nika ê pêro bêkar ê û nêeşkenê karêk bivînê. Çewî zî hetkarîya ma nêkerde. Zaf merdimî mexdûr bîyî. Mi 40 xebatkarê xo neçarîye ra karî ra vetî.''