Gerîlayê HPG’yî Alî Ete (Zagros Bahoz) yo ke 6’ê Tebax a 2018’î de pîya bi 6 embazanê xo Dêrsim de şehîd bibi, 9 mengan ra dima qezaya Pulurî ya Dêrsimî de, bi fikro ke HPG’yijêko bîn o bi nimitkî amebi definkerdene.

Keyeyê Eteyî yo ke şi Pulur bi destûrê Dozgerîya Komare cayo ke ûca amebi nimitene ra ame vetene û ereyîya şewe de ard mehlaya Stasyonî ya qezaya Artûklû ya Mêrdînî.

Cenazeya Eteyî ya ke bi wesayîtêkê taybetî yo ke deman kerdibi arde Mêrdîn, verê keyeyî de bi tîlîlîyan ameye pêşwazîkerdene. Cenaze hetê xeylî kesan ra ke mîyanê înan de parlamentera HDP’yî ya Mêrdînî Ebrû Gunaye zî estbî ameye pêşwazîkerdene û dima ra cenaze berde Goristanê Stasyonî.

Goristan hetê bi desan wesayîtanê zirxinan û hêzanê çekdaran ê dewleta Tirkî ra ame dorpêştene, nêverda ke teberê merdimanê Eteyî de çew bikewo goristan. Endamanê keyeyî bi duayan cenaze berde cayo ke ameye wedartene. Cenaze bi tîlîlîyan ameye wedartene, verê keyeyî de xeymeya serweşîye amî ronayene.