Fermandaranê Akademîya Apollonî ra Dêrsim Nurhakî Radyoya Dengê Welat rê konsepto newe yê hêrişan ê dewwleta tirke ercna. Qiseykerdişê Nurhakî ra beşêk wina yo:

''24ê temmuza 2015î de hêrişan dest pêkerd. Nê hêrişî çarçewa konseptêkî de yenê kerdene. Bingeyê dewleta tirke de îmhaya kurdan esta, bingeyê nê konseptî de zî na îmha esta. Dewleta tirke plan kerdêne ke gerîlayan biancê Rojawan û Başûr û yew bi yew tasfîye bikera. La gerîlayan Kobanê û cayanê bînan de vera cerganê DAÎŞî serkewtişî pîlî vistî destî û bala dinya ante xo ser. Dewleta tirke nêeşkaye Şorişê Rojawanî bişikna yan zî PKK binê nameyê 'terorîzmî' de reş bikera. Dewleta tirke naye ra dima temmuza 2015î de konseptêko newe vist dewre û vera sîyasetê legalî yê kurdan têgêraye. 

Dewleta tirke pê pêro îmkananê xo û paştdayîşê teberî 6 serrî yo bi hawayêlê topyekûnî hêrişê kurdan kena, hedefê ci zî tasfîyeya PKKyî bîye. Dewletê Ewropa zî îqtîdarê AKP-MHPyî û Trirkîya mabênê xo û cîhadîstan de sey dêsî şuxilnenê. Dewleta tirke 6 serrî yo sey wextanê bînan xîret kena ke îradeyê gerîlayan bişikna. Nika zî Tirkîya pê hetkarîya tay hêzanê Kurdîstanî xîret kena ke PKKyî çin bikera. Dewleta tirke 6 serrî yo Xakûrkê ra heta Efrînî, Zapî ra heta Şingalî hêrişê Kurdîstanî kena. Dewletê bînî hem nê hêrişan peygoş kenê hem zî paştî danê ci. La gerîlayî sey her çaxî derbanê pîlan danê Tirkîya ro û Zap, Metîna û Avaşîn de bi hawayêkê bêhempayî xo ver danê. 

Hêzê gerîlayan dewrê neweyî de xo kenê newe, taktîk û metodanê xo kenê zengîn. Dişmen nika nêeşkeno girêkî ra 3 mengan ra ver vejîya. Gerîlayî hêrişanê dişmenî şiknenê. La dişmen pê helîkopter, teyrayan, bombaya gazî, gazê jhrinî, çeka kîmyewî hêriş keno. Dewleta tirke Zendûra de, Mamreşo de pê cergan, leşkeranê kîrakerdeyan şer kena. Dewleta tirke kena ke pê teknîkî se rbikewa la gerîlayan xo pawenê û teknîkê înan pûç kenê.

Gerîlayî zî hînî teknîkê înan şinasnanê û goreyê ci amadekarîya xo kenê. Heftanîn, Xakûrkê, Zap, avaşîn û Metîna de ma eşkenê pratîkê ney bivînê. Dewleta tirke pêro çimeyê xo semedê nê şerî xerc kerdî coka nika mîyanê krîzê ekonomîkî de ya. Dewleta tirke hetêkî ra wazena ke binkewtişê Garê vîran ra bikera. Gerîlayî Hemleyanê Bazanê Zagrosî û Cengê Xabûrî de mojnenê ke ê eşkenê pê felsefeya Rayberîye û îradeyê xo heqê artêşa îşxalkere ra bêrê. Ewro hema zî gerîlayî serê xeta fedayîye ya Zîlane de şer kenê, xoverdayîşê xoîdarekerdişî yê 2015-2016î zî pê nê ruhî ameyî kerdene. 

Xoverdayîşê şarê kurdî,xoverdayîşê zîndanan, xoverdayîşê gerîlayan û xoverdayîşê Îmraliyî yê Rayberîye ruhê fedayî eşkera kenê. Hêzê komplogêrê ke Rayber apo kerd esîr, hetê dewleta tirke de yê, ê pîya têgêrenê û paştî danê îşxalê tirkan. Zerrîya pêro kurdan seba gerîlayan dana piro. 

Ma do sey gerîlayan û şarî çi bikewo milê ma bikerê û xoverdayîşê şehîdan rê dewam bikerê. Ma pêro embazan selam kenê û şehîdan bi rêzdarî yad kenê. Ma perwerîya xo ya seba Rayberîye anê ziwan, selamê xo ci rê şawenê. Ma pê bawer ê ke do ser bikewê.''