Hemserekê DBPyî Keskîn Bayindirî pare kerd ke alozîya nikayêne ya Başûrê Kurdîstanî alozîya mabênê PDK û kurdan de ya û îfade kerd ke ganî PDK peynîyan hemkarîya xo ya bi dewleta tirke bîyaro, kurdan ra xizmet bikero.
Hemserekê Partîya Herêman ê Demokratîkan (DBP) Keskîn Bayindirî polîtîkayê şerî yê PDKyî yê vera kurdan ANFyî rê ercnayî.
Bayindirî ard ziwan ke PDK vera armanc û waştişanê şarê Kurdîstanî polîtîkayanê gemarinan ano ca û vat: ''PDK seba menfaatanê xo têgêreno û nê menfaatî armanc û waştişanê kurdan ra dûr ê. Polîtîkayanê PDKyî ra se 40 erdê Başûrî destî ra şîyo.Ewro zî PDK wazeno bi hemkarîya Tirkîya Kurdîstan parçe bikero. Sebebê alozîyan zî no yo. Her roje rêxistin û partîyê Başûrê Kurdîstanî vera PDKyî nêrazîbîyayîşê xo anê ziwan. Alozîya Başûrî alozîya mabênê PDK û kurdan de ya. Ganî PDK nê polîtîkayanê xo ra fek vera bido û goreyê waştiş û armancanê kurdan têbigêro, xizmetê kurdan bikero. Dişmenê kurdan nika kenê ke kurdî vera yewînan şer bikerê. Kurdî nika seserra 21. de ver bi azadîye şinê û nêzdîyê statuyê xo yê. Ganî PDK goreyê nê krîteran têbigêro.''
Bayindirî da hesibnayene ke PDK wayîrê hîşmendîyêka tarî ya û vat: ''PDK bi taybetî Şingal û Rojawan ser o polîtîkayanê gemarinan ano ca. Bi peymana Şingalî PDK qet yew menfaat û destkewteyê kurdan nêpaweno. Polîtîkayê AKP û PDKyî sey ci yê. Tirkîya pêro polîtîka, merkezê leşkerîyî û MÎT Başûr de ca kerdî. Eke partî û rêxistinê kurdan bêrê qelskerdene 24 saetan de Tirkîya eşkena Başûr îşxal bikera. PDK seba kurdan bira şerî girewte.''
Bayindirî peynîya qiseykerdişê xo de venga pêro rêxistin, rayber û sîyasetmedaranê kurdan da ke verê alozîye bigêrê û seba yewîya neteweyîye bixebitê.
