Bi wesîleya 15ê Gulane Roşanê Ziwanê Kurdkî partî û dezgehanê mesajî pare kerdî.

Kongreya Neteweyî ya Kurdîstanî (KNK) mesajê xo de vat: ''Kurdî semedê domanayişê estbîyayîşê xo bi serran o xover danê. Kurdî ganî semedê wayîrvejîyayîşê ziwanê xo têkoşînî pîl bikerê. Ziwanê me serê welatê ma sey estareyî çiruskîyeno.  Eke no estare xij bibo manaya estbîyayîşê kurdan nêmanena.''

Parîya Demokratîke ya Şaran (HDP) zî Roşanê Ziwnê Kurdkî bimbarek kerd û vat: ''Wayîrvejîyayîşê nê ziwanê rindî wezîfeyê ma yo verên o û bingeyê têkoşînê ma yê sîyasîyî yo. Tarîxê kurdan ra vera kurdkî polîtîkaya asîmîlasyonî esta. Vera na polîtîka ma wazenê kurdkî wa bibo ziwanê perwedeyî.''

Platformê Ziwanê Kurdkî zî semedê paştdayîşê kampanyaya îmzayan veng da û vat: ''Wa xebatanê sîyasîyan û aktîvîteyan de kurdkî bêro qiseyekerdene. Hunermendî wa kurdkî bixewtî. Veyve û şayîyan, çapemenî, warê bawerî, keye, kuçe û her ca de wa kurkî bêro qiseykerdene. Semedê averdişê ziwanî wa pêro waranê cuye de timûtim kurdkî bêro qiseykerdene''

Partîya Herêman ê Demokratîkan (DBP) zî vat: ''Wa zextê vera kurdkî bêrê qedînayene û komeleyê kultur û hunerê kurdan ê ke ameyî qefilnayene wa newe ra bêrê akerdene. Wa kurdkî sey fermî Qanûnê Bingeyî de bêro cakerdene û bibo ziwanê perwerdeyî.''

Unîversîteya Rojawanî zî ziwan sey estbîyayîş û nasnameyî name kerde û vat: ''Rixmê heme hêrişan kurdkî zengînîya xo pawite.''

Reyna xeylêk komeleyanê bînan ê kurdan bi wesîleyê Roşanê Ziwanê Kurdkî eşekrayîye daye waşt ke ziwanê kurdkî têna yew roje nê timûtim bêro wayîrvejîyayene. Eşkerayîyayan de ame vatene ke wa her kes keyeyê xo biarçarno mektebêk û bi kurdkî biciwîyo.

Komeleyanê nuştox û edebîyatkaran zî eşkerayîya hempare daye û vat ê do seba ke kampanyaya 'Wa kurdkî bibo ziwanê perwerdeyî' ya ke sêrkeşîya Torra Ziwan û Kulturê Kurdan û Platformê Ziwanê Kurdkî de ameye destpêkerdene ser bikewo do çîyo ke destê înan ra bêro bikerê.