Koordînasyonê YRD’yî (Yewîya Çapemenîya Demokratîke) vat “Ma roja 22’ê Nîsan a rojnamegeranê Kurdistanî sey rojêka hîna xurtkerdişê tarîxê dewamkerdişê tradîsyonê Serxwebûnî vînenê.”

YRD’yî peyamê xo de vat bi wesîleya ewroyî ganî rojnamegerî prensîb û gureyanê xo çim ra ravêrnê û vat: “22’ê Nîsane ya ke sey roja rojnamegeranê Kurdistanî yena qebûlkerdene seba newe ra çim ra ravêrnayîşê prensîb û gureyanê rojnamegeran rojêka xeylî manîdar a.”

Rojnameyo Ewilên: Kurdistan

Peyamê YRD’yî yê 22’ê Nîsane wina yo: “Roja 22’ê Nîsane 1898 de hetê Mîqdat Bedirxanî ra rojnameyo ewilên o Kurdî ame vatene ke na roje sey roja rojnamegeranê Kurdan ameya îlankerdene. Rojnameyê Kurdistanî ra heta kovara Hewarî, kovara Îlerî Yûrtî ra heta Serxwebûnî xeylî weşanan xo rê mucadeleyê Kurdan kerd rojdemo sereke. Gama tarîxî Adar a 1979’î ramotêne bi vejîyayîşê Serxwebûnî tradîsyonê çapemenîya Kurdî zî kewt merheleya çapemenîya azade.

Tarîxê Bi Hawayêkê Hîna Xurtî Dewamkerdişê Tradîsyonê Serxwebûnî

Ma zî sey Yewîya Çapemenîya Demokratîke (YRD) roja 22’ê Nîsan a rojnamegeranê Kurdistanî sey rojêka hîna xurtkerdişê tarîxê dewamkerdişê tradîsyonê Serxwebûnî vînenê. Ewro wezîfeyê rojnamegerîye o yo ke senî şarî belayê modernîteya kapîtalîste ra bifeletnê. Ma seba her qismê cimatî, seba şarê Kurdî, cinî, ciwan û domanan bawer kenê ke rayîrê azadîye xurtkerdişê mucadeleyî ra ravêreno. Ma çinkerdişê xoza sey çinkerdişê merdimîye vînenê. Ma bawer kenê ke ganî Rayberê Konfederalîzmê Demokratîkî Abdullah Ocalan azad bibo û bibo wayîrê şertanê xebatan ê azadan. Eke o bireso nê şertan do şarê Rojakewtena Mîyanêne zî bi azadî biciwîyê. Naye ra ma bawer kenê ke bi wesîleya 22’ê Nîsane roja Rojanemgeranê Kurdistanî rojnamegerî prensîb û gureyanê rojnamegerîye rê wayîr vejîyo ancax bi nê hawayî do na roje manîdar bibo.

Her Dîmenê Çapemenîya Azade Hemverê Faşîzmî De Mucadeleyêk O

Ewro bi seyan rojnamegerî Vakurê Kurdistanî de binê hêrişanê giranan ê faşîzmî de bê ke prensîbanê çapemenîya azade ra tawîz bidê xebate kenê. Ancî Vakurê Kurdistanî de û Tirkîya de hemverê faşîzmê AKP-MHP’yî de bi seyan rojnamegerî zîndanan de xover danê. Vakurê Sûrîye de bi seyan rojnamegerî rixmê hêrişanê faşîzmî de her gama serkewtişê pîlî qeyd kenê, her rehendê şerî dinya dir pare kenê. Başûrê Kurdistanî de zî hemverê hêrişanê peydemende û hemkarperweran de bi seyan rojnamegerî seba awankerdişê Kurdê bianor û azadî rojanemgerîya azade kenê. Rojakewtena Kurdistanî de rixmê zextanê rejîmî de rojnamegerî xeberan virazenê û xebetênê. Ancî Ewropa de bi desan rojnamegerê Kurdan bi tradîsyonê çapemenîya azade yê Serxwebûnî bi heyecanê roja ewilêne xebatanê xo rayra benê.

Ma zî sey organîzasyonê Yewîya Çapemenîya Azade Selçûkan ra heta Gûrbetelîyan, Denîzan ra heta Dilişanan, Rizgaran ra heta Mûstafa, Mehmet û Firatan meşaleyê azadîye dewr gênê û seba awankerdişê Kurdê azadî û cinîya azade Kurdistan û her cayê dinya de na roja hemeyê rojnamegeranê Kurdistanî yê ke kede danê pîroz kenê, xebatanê înan de înan rê serkewtiş wazenê.”