Hêrişanê îşxalî yê vera Garê 10ê sibate de dest pêkerd û artêşa tirke neçare mende ke 14ê sibate de xo apey bigêra. Goreyê Fermandarîya Qerargehê Merkezê Pawitişê Şarî (MPŞ) artêşa tirke ya waştêne ke Garê de ca bida xo û esîran bivisna destî.

MPŞyî eşkera kerdbi ke 40 ra zêdêr ÎHA û SÎHAyan Garê daye bombayan ver, warê kampa esîran ê Sîyanê de 6 bi temamî 15 gerîlayî şehîd bîyî. MPŞyî pare kerdbi ke 37 hêzanê artêşa tirke ameyî kiştene, derbî dîyayî 2 skorskîyan.

Îşxalî ra dima

Hêrişanê îşxalî ra dima artêşa tirke remaye û gerîlayan dest na malzemeyanê înan ê leşkerîyan ser. Gerîla Hogir Medî îşxalî ra dima derheqê dîmenan de qal kerd.

Medî derûdor mojna û vat: ''Embaz roket nêşuxilîyayo, her ca pê kazanan dîyayo bombayan ver.''

Medî binê hewayê mijînî de pê kamuflajê xo kamera reyde qisey kerd û çeka ci zî destê ci de bîye:''10ê sibate de warê Garê de bi nameyê ‘Kartal Pençesi 2’ operasyonêko hîra dîya destpêkerdene. Verî bi desan teyarayanê şerî herême daye bombayan ver.'' Med pê destê xo derûdor nîşan keno û vano ke saetanê rewan de kobrayan herême daye bombayan ver.

Med wina dewam keno: ''Înan waştêne zêdêr leşkeran bîyarê war. La hesabê Anqara raşt nêbîyî. Ê raştê xoverdayîşê gerîlayan ameyî. Înan medya de vat tay payeberzê înan merdê la a raşte zerarê înan pîlêr o. Dewleta tirke komelê xo xapînena. Seba ke ê bin kewtî vat 'operasyon herêmkî bi. Vera Qendîl prova bi.' Wina înan raştîye nimite.''

Înan pê destê xo leşkerê xo kiştî

Medî pê destê xo kampa esîran nîşan daye û vat: ''Seke dîyeno înan tîya de xîretê qirkerdişê pîlî kerd. Înan pê destê xo leşkerê xo qetil kerdî.''

Medî ard ziwan ke leşkerê tirkî a herême de nêeşkenê vinderê coka înan bombarduman kerd. Medî parçeyê bombayan mojnayî û vat: ''Wexto ke ê xîretê warardişî de bîyî embazan derbê giranî dayî înan ro. Embazan pê xoverdayîşê xo ê kerdî mîyanê tengîye. Înan bombardumanêko giran kerd, gaz şuxilna. Bombarduman û gazî ra esîrî merdî. La înan sûc eşt ma milî. Embazan pê taktîkanê dewrê neweyî hêrişê înan kerdî pûç. 3 rojan gerîlayan xo ver da, hêzanê ma her ca ra çalakîyî kerdî. Netîce de dişmenî xo apey ant.''

Îşxalkeran darî birnayî

Med reyna dekewtişê warî mojneno û vano: ''Ê tîya de nêeşkayî zaf aver şîyê.'' Med dima daran mojneno û vano: ''Înan seba ke dorme bivînê xoza texrîb kerde, xeylêk darî birnayî. Bi nê hawayî înan kerd ke herême de serdest bibê la embazanê ma rayîr nêda înan.''

Gerîla Med dima pêlekanê ke leşkeranê tirkan ardê mojneno û vano: ''Înan seba viraştişê mewzîyan nê pêlekî ardî. Înan firsend nêdî ke nê pêlekan bişuxilnê.''

Reyna Med balyoz, kuwa û tuwerzînan mojneno: ''Nê zî seba viraştişê mewzîyan ê. La dişmen nêeşka nînan zî bişuxilno. Dîmenan de dîyeno ke ê senî tîya de mendî, raştê astengîyan ameyî û gerîlayan înan senî kerdî mîyanê tengîye.''

Mîyanê nê malzemeyan de lapikî, bombayê gazî, şarjotî, maskeyê gazî, malzemeyê weşîye, kamuflajî, yelêgî û konserveyî estê.

Mîrkan Karker: Ma binê keşîfî de şîyî serê înan

Gerîla Mîrkan Karkerî wina behsê hêrişan kerd: ''Hêrişan saete 03.00 de dest pêkerd. Pêro noqtayî bi giranî dîyayî bombayan ver. Înan 10 ra zêdêr kazanî eştî hetê ma. Ma sey gerîlayan eşkenê verê nînan tedbîran bigêrê. Wexto ke ma warî ra vejîyayêne 10 ra zêdêr teyarayê kefşî estbî. Ma sey grûban şîyê serê dişmenî. Dişmen xora tersnek o û tede hunerê şerî çin o. Teyara û kobrayî vera îradeyê gerîlayan nêeşkayî vinderê. Ma tersê înan û fedakarîya embazanê xo dîyî. Înan xîret kerd ke ma bigêrê binê ablûqa. La a raşte ma ê girewtî binê ablûqaya xo. Ma pêro hetan ra da înan ro. Garê de şerêko bi şîdetîn qewimîya. Ma nê şerî îradeyê gerîlayan dî. Ma bêîdare û bêbawerîya dişmenî zî dîye. Embaz Şoreş kampa esîran ra mesuldar bibi. Wexto ke dişmenî da girêkî ro Şoreş binê 6 teyarayanê keşfî, şer û kobrayan de şi serê dişmenî. Ey bi xo gir kerd veng. Ma remayîşê dişmenî dî.  Tîya de destanî nusîyayî. Her roja 4 rojan bi xo destanêk bi. Gerîlayan rixmê hewayê serdî û îmkananê kêman sey hêzêkê profesyonelî xo mojna ra.''

Karkerî pare kerd ke dewleta tirke îdîa kena ke pêro gerîlayî seba Garê seferber bîyê la raştîye wina nîya. Karkerî vat: ''Teyna ma ra çend baskan da înan ro. Ma pê îrade û hêzê xo bawer ê. Ê nêeşkenê verê ma de vinderê. Ma qîrayîşê înan eşnawitî. Ma sey 20 kesan ê girewtî binê ablûqa û perîşan kerdî. Wa şarê ma zî pê nê îrade û serkewtişî şa bibo. Wa şarê ma îradeyê xo hêzêr bikero û hetê gerîlayan de ca bigêro. Wa ciwanê kurdî zî hînî vajê bes o.''

Karkerî vist vîrî ke armancanê nê operasyonî ra yew zî sey 'xelisnayîşê esîran' ameyo îfadekerdene û vat: ''Nê esîrî ma destî de bîyî. PKK pê exlaq, perwerîya xo ya bi heqan şinasîyeno. Ma sey dewleta tirke nîyê. Ma esîran rê îşkence nêkenê. Dewleta tirke kampe arde sereyê înan. Înan zere de gazê kîmyewî xebitnayî. Ê zîndanan de merdimanê ma rê îşkence kenê. La ma sey dewleta tirke nîyê. Ma rêxistinêka polîtîke û biexlaq ê.''

Şoreş Zeryan: Înan xo apey nêant, ê remayî

Şoreş Zeryanî hêrişanê vera Garê de baska hêrişî ya gerîlayan de ca girewt. Zeryanî eşkera kerd ke leşkeranê tirkan Garê de cenazayê xo verdayî û remayî.

Şoreş Zeryanî wina qala hêrişanê vera Garê kerd: ''Serê sibayî saete 03.00 de tewr tay 40 teyarayan vera Garê operasyon kerd. Înan bi teknîkî hewayî ra hêriş kerd. Embazanê ma zî derbî dayî înan ro. Ma baska hêrişî bîyî.  Ma sey çend baskan şîyî serê înan. Xora dişmenî cenazayê xo zî verdayî û rema. Ma ê girewtî binê ablûqa. Coka ê nêeşkayî operasyon dewam bikerê. Apeyantiş nê ê remayî. Cenazayê înan war de bîyî. Ma dî zafê înan payeberz bîyî. Tîya warê gerîlayan ê coka ma bi rehetî xo resna ci. Hetê Sîyanê de şikefteyê esîran estbi. Tede leşker, polîs, endamê MÎTî û bêbextî estbî. Dişmenî nê pêroyî bi xo kiştî.''