Hêrişê dewleta tirke yê Herêmanê Pawitişî yê Medya dewam kenê. Gerîlayê HPG û YJA Starî vera nê hêrişan têkoşînê tarîxî danê. Artêşa tirke ya ke nêeşkena xoverdayîşê gerîlayan bişikino vera înan çekanê kîmyewîyan şuxulnena û sûcê şerî kena. Xoverdayoxanê Avaşînî ra gerîla Çekdar Gabarî ANFyî rê qala nê têkoşînî kerde.

Çekdar Gabarî qala çalakîya ke Qilê Piramîtî yê herêma Şûke ya Avaşînî ya kerde. Şehîdî Şerzan Qaşûrî (Şaban Ecer) û Pîrdogan Amed ê ke xeylêk çalakîyanê Avaşînî rê serkêşîye kerde û derbeyê pîlî dayî dişmenî ro, înan zî na çalakîye de cayê xo girewtbi.

Gabarî ard ziwan ke dişmen vera na çalakîya serkewtîye ya ke planê înan pûç vetî de mat mend û vat:  ''Seke yeno zanayene menga nîsane de vera Zap, Avaşîn û Metîna hêrişê îşxalî dest pêkerd. Ma zî roja verêne ra xoverdayîşê Avaşînî de cayê xo girewt. Ma xoverdayîşê Mamreşoyî Şehîd Serdarî esas girewt. Pê coşê têkoşînî serkêşîya embaz Şerzanî de ma vera dişmenî çalakîyî kerdî. Verê çalakîya Qilê Pîramîtî embaz Şerzanî şi keşîf kerd, çalakîye plan û koordîne kerde. Gama ke ma resayî qilî dişmen şaş bi mend. Wina yew erazî de gerîlayî senî eşkayî mîyan biresî qilî. Dişmen şok bi. Xora embazanê hela ke çalakîye daye destpêkerdene leşkerî remayî. Êyê ke mendî înan zî nêzanayênê çi bikerê. Dişmenî cenazayê xo zî caverdayî û rema. Înan çîyo winayên hesab nêkerdbi.

No xoverdayîşê ko biheybet bi ke dişmen serûbin kerd û embazan de moralêko pîl aferna. Çalakîye de çar leşkerî ameyî kiştene û hîrê çekê dişmenî ameyî destfînayene. Çalakîyêka bitesîre bî. Fermandarê ma şehîd Şerzan bi. Heme embazan embaz Şerzanî ra hêzo pîl girwetêne. Çalakîyê ke serkêşîye embaz Şerzanî de ameyî kerdene  ma  înan ra zaf çî musayî û ma rê bîyê tecrubêyêko pîl. Şehîd Pîrdogan Amed zî çalakî de ca girewt. O zî şervanêko serkêş bi.''