Seba ke hiş û vîrê merdiman bi hawayêkê demdergî bimano, cografya faktorêka muhîm a. Kurdistan zî wayîrê erîzîyêka asêye yo, tede kaş û kuşî, qîyameyê dergî estê û axpîn o, bîyo halîn hişê merdimîye rê. Gerîlayê HPG’yî wareyê tewr berzî de cehd kenê ke nê hişî bipawê. Înan ra yew zî gerîlayê HPG’yî Yilmaz Şaho yo.

Yilmaz Şaho serra 2014 de tewrê refê gerîlayan bi. Dimayo ke perwerdeyê xo yê destpêkî yê şerwanî qedêna, verê xo da Heftanînî; ceneto hewt rengin, ca û wareyê koyanê berzan, newalê xorînî...

Gerîla Yilmaz Şaho têkoşînê xo yê azadîye Heftanîn de dewam keno. Şaho Girê Partîzan ra heta Çemê Rêhevalî, Dêrê Sîyanî ra heta Xanturî, Girê Qerîsokî ra heta Newala Ahmet Rapoyî qalê rindekîye û weşîya Heftanînî keno. Hetê bînî ra bale anceno serê qehremanîya ke zereyê na rindekîye ra vejîya û şehîdan ê ke kedêkê girdî dayê.

Gerîla Yilmaz Şaho dimayê perwerdeyî Girê Partîzan ê Heftenînî de ame wezîfedarkerdene. Şahoyî vat, “Girê Partîzanî serê sînorî de yo, coka verê xo ver bi Vakurê Kurdistanî yo. Bi berzîya xo zerrîya merdiman keno weş. Girê Partîzanî winî rindek o ke merdim nêeşkeno çimanê xo ci ra bigo. Erazîya ci ya zore esta, coka merdiman xo ra girê dano. Seba ke merdim bi keda xo Heftenînî de ca virazeno.  Destpêk de ma zehmetîye antêne wexto ke vejîyêne serê girî. Labelê bado ma û koyî bî yew. Mi fam kerd ke heta ke heskerdişê ma bibo, koyê ke rayîr nêdanê gerîlayan çin ê.

Şehîd Dilsoz 4 serrî mend

Şahoyî  dewamê ci de vat, “Rêça xeylî hemrayan serê Girê Partîzanî de esta. Înan ra yew zî Şehîd Dilsoz o. Şehîd Dilsoz sey nameyê xo hevalêkê zerrî û can ra bi û felsefeya Rayberî xo de kerdebî xorîne. Her wezîfeyê rêxistine, çi qij çi zî gird bo cehd kerdêne û ardêne ca. Ma zî bi nê hawayî perwerde kerd. Bi taybetî hetê mentiqê eskerîye ra wayîrê hişêkê xurtî bi. Hemrayîya ey a xurte merdim timî antêne serê xeta rêxistine. 4 serrê Girê Partîzanî de mendişî ra dima derbazê Vakurê Kurdistanî bi û uca de şehîd kewt.

Hênîyê ke gerîla rê bîyê hemrayî

Heval Cemal seba Kanîya Rêheval a Girê Partîzanî vano, “Kam Heftenîn de xebet bikero, la nêşoro Kanîya Rêheval a Girê Partîzanî ra awe nêşimo, wa mevajo ez Heftenîn de menda. Awa Kanîya Rêhevale pak a, bi taybetî hamnanî sey cemed a.

Kaleka Girê Partîzanî de girêk bi nameyê Qesîrokî esto.  Xeylî berz o û zinarê xeternakî estê. Merdim normal de hîrê saetan de eşkeno xo biresno serê Girê Qesîrokî, labelê êdî hende ke şîyî ameyî yew saete, nêm saete de şinê serê nê girî. Her ke resena serê nê girî, xo gamêka bîne nêzdîye azadîye vînena.

Şehîd Ahmet hertim ma reyde yo

Mabênê Girê Partîzanî û Qesîrokî de Newala Şehîd Ahmedî esta. Newale nameyê xo Şehîd Ahmet Rapoyî ra gêna. Her cayê ci daristan û zinar ê. Şehîd Ahmet Rapo hîna wextê ARGK’yî de nê cayan de mendo. Nê cayan de sey hewayê sîstemê yewîye û taburî mendê. Ma her ke na newale ra derbaz benê Şehîd Ahmetî timî xo reyde hîs kenê.

Ma rêça înan ser o dewam kenê

Hemra Adîl, fermandarê rayberîyan ê na partîye ra yew bi û wextêko derg Heftenîn de gerîlayîye kerde. Hetê bînî ra seba ma manaya Heftenînî ya bîne, hemra Vîyan a. Vîyane bi adirê bedenê xo Rayberî rê bîye mertale. Heta ke ma tîya bê ma do vîrardişê hemra Adîl û Vîyane rê wayîr vejîyê û seba heyfê înan şer bikerê.”