Hemrayêkê ey bi nê vatişan dest bi qalê gerîla Agirî keno: “Agir domanêko tewr rindek, tewr cengaver û tewr qehremanê nê şarî ra yew bi. Seba ke sey ê verênanê xo seba ke emanetanê înan biresno wayîran ê ci sey înan ciwîya, sey înan şer kerd, sey înan rayra şi, sey înan bi wayîrê hesrete, sey înan zana ke kotî de ganî bivindo. Rastîya cimatî qebûl nêkerde û vera sîstemî tewrê cepheyê destpêkî bi. Zerrîya ci reste koyanê girdan. Nê erd û koyan xeylî qehremanî dî. Gelo nê koyan viranê fîşte çend qehremanan ro? Wa ziwanê nê koyan bibîyêne qisey bikerdêne.”

Aydin Demîr bi nasname Agir serra 1980 de Çewlîg de ame dinya. Heta çendayê emrê xo Çewlîg de mend û bado sey xeylî keyeyanê Kurdan teba keyeyê xo ra rîyê zextê dewlete ra koçê Stenbolî kerd. Girêdayîya ey ya bi rastîye, bi Kurdîye û nasnameyê xo kerd ke wextêko kilm de bibo serekê baskê ciwanan ê qeza û tewrê xeylî wezîfeyan bi.

Koyî…  Seba Kurdan timî bîyê wareyê ciwîyayîşî. Bîyê kelayê azadîye û cuye. Temamê  tarîxî de xoverdayîş û qehremanîya Kurdan rê şahîdîye kerda. Koyê ke deyîra Kurdan vanê. Seba Agirî zî her tim bîyî hêzêkê efsûnî. Coka karê ke ey kerdêne êdî o mird nêkerdêne û qerar da ke xo biresno koyanê ke adirê serewedaritişî veşeno. Serra 2004 de menga Nîsane de herêma Kelareşê de tewrê refê gerîlayan bi. Nameyê Agirî na xo ro, birazayanê ey ê ke tewrê gerlîlayan bîyê zî nameyê Ciwan, Erdal û Yilmaz na xo ro.

Hemrayê Agirî qalê ey kerd: “Dimayo ke wextêk perwerdeyê şerwananê neweyan girewt teba birazayanê xo wextêko kilm de tewrê cuya gerîlayan bi. Wextêk ra tepîya bi tewrbîyayîşê xo yê aktîfî bale ante xo ser. Dimayê perwerdeyî amancê xo zî gird kerd. Çîyo ke ê fikirîyayêne o bi ke koyanê efsanewîyan ê Vakurê Kurdistanî de bibê gerîla. Koyanê Dêrsimî de, koyanê Çewlîgî de, koyanê Erziromî...

Embaz Agirî verê xo da Erziromî, embaz Ciwanî zî verê xo da Dêrsim. Embaz Agir mabênê çend serranê gerîlayîya xo de bi zerrînizmîya xo timî nêzdîyê hemrayanê xo bi, bi jêhatîya xo timî bale ante. Koyê Çewlîgî wextê verî ra nata bi seyan, bi hezaran gerîlayan rê virana xo akerda. Gerîlayanê ke derbê giranî dayê dişenî ro, hîrê rojî bi hawayêkê bêhemparî xo ver da bî. Heybetê xoverdayîşî hêzê dişmenî bê bîhne verdaybî. Mîyanê şerê giranî de Agir bibi adir, fîşekê ke çeka ra vejîyenê ê bîbî adir.’’