Fermandaranê HPGyî ra Kurtay Şahînî ke ANFyî rê qisey kerd, vat: Artêşa tirke xeta Zagrosan de netîceya ke waştêne nêfînaye dest, cayê ke îşxal kerdî de zî nêzana se bikero û senî tira vejîyo.

Şahînî bale ante xoverdayîşê tarîxî yê gerîlayan ser û vat:  ''Dewleta tirke îdîa kena ke gerîlayî qedîyayî û çalakîyan nêkenê. La tam cayo ke wina îdîa kerd de çalakîye ameye kerdene. Tay cayî îşxal kerdî la ê zî zanê ke ê cayî do înan rê memanê. Cayê ke îşxal kerdî de nêzana se bikerê û senî tira vejîyê. Artêşa tirke wazena ke tay cayanê sitratîjîkan rê hukm bikero kontrolê sînorî bigero la gerîlayî destûrê înan nêdanê.

Xora ê seba ke nêeşkenê leşkeranê xo zî tîya vindarnê dewijan şuxulnenê. Gerîlayî herême de verê falîyetanê ajanîye yê înan zî genê. Dewleta tirke heme hêzê xo seferber kena, bombardumanan kena ke hêvîya şarê ma bişikno. Gerîla pê tekînîkî tasfîye nêbeno.Teknîk nêeşkeno îradeyê gerîlayan bişikno. No îrade serewedaritişanê kurdan ê tarîxî ra heta ewro ame. Ma mîrasê xoverdayîşî danê rayraberdene.''

Şahînî vist vîrî ke dewleta tirke zaf paşta xo yewîyanê nimiteyan rê girê dana û vat: ''Gerîlayo ke bewlî nîyo çiwext ça de dano piro yewîyê nimiteyî zî kerdî bêtesîr. Gerîla înan teqîp kenê û danê piro. Artêşa tirke zî zana ke ê pê teknîk yewîyanê nimiteyan nêeşkenê verê gerîlayan bigerê. Her roje vanê ma gerîlayî qedînayî, ma do siba biqedînê. Gerîla tasfîye nêbeno her roje bi tewri û taktîkanê neweyan xo aver beno.''

Fermandaranê HPGyî ra Kurtay Şahînî vist vîrî ke tecrîdê serê Rayberê Şarê Kurdî  bi xorîbîyayîşî dewam keno û vat:  ''Gerlîa pê şerê ke rayra beno, tewir û takdîkanê xo ramojna ke şar têna nîyo û ê rêça Rayberîye ra şine. Gerîla semedê azadkerdişê Rayberîye çalakîyan keno. Hedefê ma oyo ke ma pê çalakîyan hêrişan rê bibê cewab û têkoşînî biresnê serkewtişî.''