Gerîlaya YJA Starî Dîlvine Cana ke 16ê êlula 2019î de qezaya Hawêlî ya Sêrtî de şehîd bibî, Goristanê Bêkasan ra ameye girewtene û Goristanê Asrî yê taxa Guneykentî ya Êlihî de bi merasîmêkê xurtî ameye definkerdene.

Selahîyetdaranê dewlete 1ê hezîrana 2021î de xebere daye keyeyê Canî ke wa şiro semedê testê DNA gonî bido. Nayî ser o keyeyî 2ê hezîrane de Nêweşxaneyê Perwerde û Cigêrayîşî yê Sêrtî de gonî daye. Vizêr netîceya testî safî bîye  û keyeyî warê bêkesan ê Goristanê Zevye ra cenazaya xo girewte. Polîsan verî semedê kendişê gorî kepçe nêda waşt keye bi  îmkananê xo vejo. Bado ke keyeyî talîmatê dersozgerîye ramojna kepçe ame dayene.

Keyeyî cenazaya xo ardê Êlih. Bi seyan kesî tewrê cenaza bîyî. Polîsan vat têna keye eşkeno tewrê definkerdişî bibo. Şarî no qebul nêkerd û vera polîsan vejîya. Badê arbedeyêkê kilmî qismêkî şarî kewt goristan û qismo bîn dormeyê goristanî de pawit. Polîsan dekewtişê goristanî tepişt û kontrolê GBTyî kerd.

Bado ke wecîbeyê dînî yê cenazaya Cane ameyî caardene cenaza ermeyanê cinîyan ser ameye ardene goristan. Badê definkerdişî şar bi slogananê ''Şehîdî Nêmirenî''ame têhet û hûmara ci zafêr bîye. Goristanî ra ver bi keyeyê Cane rayraşîyayîşêk ame kerdene.  Dayîka Cane rayîrî ra heta keyeyî bi vatişê  "Ez diya şehida me, ez diya Dilvînim, ez natirsim" qîrayî.  Verê keyeyî de fotografê Cane ameyî kiriştene û sloganê sey ''Biciwîyo Serek Apo'' û ''Şehîdî Nêmirenî''ameyî eştene.