Warê Xoverdayîşî yê Şehîd Şahînî de 2 mengan gerîlayan rayîr nêda îşxalkeran. Komêka gerîlayan uca de binê fermandarîya Bager Gever û Avzeme Çîya de 47 rojan vera obus, helîkopter, teyarayanê şerî xo ver da û pêro îşxalkerî tarûmar kerdî. Nê gerîlayan vera îşxalkeran çalakîyê tewir bi tewirî kerdî.

Na çalakîyan ra yewe zî 29ê gulana 2022yî de ameye kerdene. Çalakîye ra dima gerîlayan pêro tehlukeyî girewtî verê xo û şîyî cenazayanê 4 îşxalkeran ser û dest na malzeme û çekanê îşxalkeran ser.

Gerîlayanê Warê Xoverdayîşî yê Şehîd Şahînî tesbît kerd ke leşkerê tirkî cenazayanê xo kendalan ra erzenê war. Roja 35. ya nê xoverdayîşî de Fermandar Bager Geverî nameyê kome ser o cîhazê bêtelî ra nê agahîyî dayî:

''Aya ke vera ma şer kena dewleta tirke nîya, çekê kîmyewî û teknolojîya NATOyî ya. Leşkerê dişmenî bi her hawayî xîret kenê ke xo bipawê, seba ke nêeşkenê bikewê tunelanê şerî zî verê tunelan de teqaberan teqnenê û heywanê bi kameraya sereyî şawenê. Ê cenazayanê xo kendalan ra erenê war û hêzê înan nêmendo ke şer bikerê. Ma zaf meraq kenê ke dişmen do naye ra pey senî hêriş bikero. Dişmenî heta nika zaf reyî bi çekanê kîmyewîyan hêrişê ma kerd, gazê nê çekan zeliqîyeno tunelanê şerî, kincan û gijikê ma. Ma na rewşe bi belge kerde. Ma selamanê embazan gênê. Ma kenê ke layîqê înan bibê. Serkewteyê nê şerî nika ra eşkera yo, ma her wextî ra zêdêr nêzdîyê Rayberê xo yê.''

Gerîla Bager Geverî mîyanê şertanê tunelî de bi dîmenî zî mesajêk amade kerd û vat: ''Înan nameyê hêrişan kerdo 'Pençe-Kîlît.' No zî girîngîya Zapî eşkera keno. Çunke goreyê înan Zap kilîdê herême yo. La eşkera yo hesabê Bazanê Zagrosî nêkerdo. Înan mîyanê pençeyanê Zapî de xeylêk derbê giranî werdî. Artêşa tirke pê çekanê kîmyewîyan û gazan hêrişê ma kena. Coka nefesê gerîlayan teng beno, sereyê înan dejeno û zerrîya gerîlayan bi lezî gulpîyena. La reyna zî gerîlayî hê dişmenî çin kenê. Ma reyna soz danê ke serkewtişî bîyarê ca û kulturê xoverdayîşî bidê dewamkerdene.''

Gerîla Avzeme: Ters kewro zerrîya dişmenî

Fermandara bîne ya kome Avzeme Çîya zî pare kerd ke ters kewto zerrîya dişmnenî û dişmen ancax pê çeka kîmyewîye eşkeno hêrişê înan bikero. Avzeme vat: ''Şuxilnayîşê çeka kîmyewîye ra dima ê xo mojnenê. Aseno ke çend tersayê û pê kîmyewîye bawer kenê. Eke înan de wijdan est bibîyêne kutikî nêerşawitêne tunelan, xo ameyêne. Ê tena wexto ke dormeyê xo vînenê û bi lêzî têgêrenê. Ma wayîrê sozê xo yê serkewtişî vejîyê.''

Merkezê Îrtîbatî û Çapemenîye yê HPGyî 21ê hezîrana 2022yî de bi eşkerayîyêke pare kerd ke tunelanê şerî yê Şehîd Berxwedanî de çar gerîlayî Bager Gever (Erkan Dara), Avzeme Çiya (Bêrîvane Cuma), Arîne Kobanê (Emira Musa) û Şerzan Hingirvan (Serkan Uçkun) 2ê hezîrane de şehîd bîyî.

HPGyî eşkerayîya xo de wina vatbi: ''Wexto ke ê tunelî de îmkanê înan qedîyayî înan bire daye ke mewzîyê xo bivurnê. La embaz Bager, Avzeme, Arîne û Şerzan uca de mendî û israr kerd ke dersêkê tarîxîyî bidê artêşa tirke. Nê çar embazanê ma rixmê îmkanê vurnayîşê mewzîyî zî tay embazê xo şawitî û bira çalakîya fedayîye girewte. Çar embazanê ma 2ê hezîrane de saete 10.00 de bi ruhê hêrişî yê berzî vera dişmenî çalakîya fedayîye kerde û tewr tay 12 îşxalkerî ceza kerdî. Hûmara kişteyan a na çalakîye tam nêameye tesbîtkerdene la dewleta tirke bi zaf reyan pê helîkopteran kişte û birîndarê xo tîya ra berdî.

Nê xoverdayîşê bi 47 rojan  serkêşîya fermandaranê ma yê çêran Bager û Avzeme de tarîxê ma yê têkoşînî de sey çalakîya newîye ya Çaran ca girewt. Çalakîya xoverdayîşî ya Çaran Zîndanê Amedî ra berz bîye û Zagrosan de şexsê Bager, Avzeme, Arîn û Şerzanî de newe ra mana girewte. Embazanê ma Bagerî û Avzeme xo rê serkewtiş kerd hedef û sey çêranê ma yê qerardar, biîrade û fedayîyan bîyî fermandarê sembolî yê Hemleya Şorişgêre ya Bazanê Zagrosî. Ma soz danê ke Hemleya Şorişgêre ya Bazanê Zagrosî binê fermandarîya Avzeme û Bagerî de, serê esasê tewirê fedayî û îradeyê Çaran de qetî biresnê serfîrazîye.''