Merkezê Îrtîbatî û Çapemenîye yê HPGyî nasnameyê 4 gerîlayanê ke Zap de şehîd bîyê eşkera kerdî. Eşkerayîye wina ya:

''Ma eşkerayîya xo ya 3yê hêzîrane de dabi eşnawitene ke 2ê hezîrane de saete 10.00 de Warê Xoverdayîşî yê Şehîd Şahînî de, tunelanê şerî yê Şehîd Berxwedanî de mabênê hêzanê ma û îşxalkeran de pêkewtişê giranî qewimîyayê û saete 11.24 de zî teqayîşêko giran qewimîyayo.

Mewzîyanê Şehîd Berxwedanî de embazanê ma vera hêrişanê îşxalî roja verêne ra heta 2ê hez^riane 47 rojî bi hawayêkê destanwarîyî xo ver da. Înan pêro teknîkê şerî, obus, hawan, helîkopter, teyarayê şerî û droneyê çekdarî yê dewleta tirke pûç kerdî. Nê embazanê ma têna pozîsyonê pawitişî de nê bi vateyê 'têna xoverdayîş nêbeno, ma qetî serkewtişî bivisnê destî' bi ruhê hêrişî tim da artêşa îşxalkere ro û Warê Xoverdayîşî yê Şehîd Şahînî de dersêko tarîxî da îşxalkeran. Nê embazê ma di reyî şîyî cenazayanê dişmenî ser, dest na çekanê dişmenî ser. La medyaya dewleta tirke nê raştîyî nimitî. La çêranê Şehîd Berxwedanî bi taybetî çalakîya 29ê gulane de 4 îşxalkerî ceza kerdî, dest na malzemeyan û çekanê înan ser, cenazayê 2 îşxalkeran zî vistî destî. Bi nê hawayî nê embazanê ma binkewtişê Zapî yê dewleta tirke bi zelalî eşkera kerd.

Nê embazê ma yê ke her yewê/a ci nîşaneya çêrî ya, seba ke dewleta tirke pê înan nêeşkaye dest eşt metodê namerdî û vera embazanê ma teqaberê giranî yê nukleerî û çeka kîmyewîye xebitnayî. Îşxalkeran bi rojan nê metodanê namerdan rê dewam kerd la reyna zî nêeşkaye îradeyê Apogîrî yê embazanê ma bişikna. Embazanê ma yê Şehîd Berxwedanî hem tim xo pawit hem zî bi marîfetî da dişmenî ro. Wexto ke ê tunelî de îmkanê înan qedîyayî înan bire daye ke mewzîyê xo bivurnê. La embaz Bager, Avzeme, Arîne û Şerzan uca de mendî û israr kerd ke dersêkê tarîxîyî bidê artêşa tirke. Nê çar embazanê ma rixmê îmkanê vurnayîşê mewzîyî zî tay embazê xo şawitî û bira çalakîya fedayîye girewte. Çar embazanê ma 2ê hezîrane de saete 10.00 de bi ruhê hêrişî yê berzî vera dişmenî çalakîya fedayîye kerde û tewr tay 12 îşxalkerî ceza kerdî. Hûmara kişteyan a na çalakîye tam nêameye tesbîtkerdene la dewleta tirke bi zaf reyan pê helîkopteran kişte û birîndarê xo tîya ra berdî.

Nê xoverdayîşê bi 47 rojan  serkêşîya fermandaranê ma yê çêran Bager û Avzeme de tarîxê ma yê têkoşînî de sey çalakîya newîye ya Çaran ca girewt. Çalakîya xoverdayîşî ya Çaran Zîndanê Amedî ra berz bîye û Zagrosan de şexsê Bager, Avzeme, Arîn û Şerzanî de newe ra mana girewte. Embazanê ma Bagerî û Avzeme xo rê serkewtiş kerd hedef û sey çêranê ma yê qerardar, biîrade û fedayîyan bîyî fermandarê sembolî yê Hemleya Şorişgêre ya Bazanê Zagrosî. Ma soz danê ke Hemleya Şorişgêre ya Bazanê Zagrosî binê fermandarîya Avzeme û Bagerî de, serê esasê tewirê fedayî û îradeyê Çaran de qetî biresnê serfîrazîye.

Nasnameyê embazanê ma yê şehîdan wina yê:

Nameyê Qodî: Bager Gever Name û Peyname: Erkan Dara Cayê Bîyayîşî: Colemêrg Maye-Pî: Gulperî – Arîf Tarîx û Cayê Şehadetî: 2ê Hezîrana 2022yî / Zap

Nameyê Qodî: Avzeme Çiya Name û Peyname: Berîvane Cuma Cayê Bîyayîşî: Tirbespiyê Maye-Pî: Munteha – Feremez Tarîx û Cayê Şehadetî: 2ê Hezîrana 2022yî / Zap

Nameyê Qodî: Arîn Kobanê Name û Peyname: Emira Musa Cayê Bîyayîşî: Kobanê Maye-Pî: Ayşe – Ahmed Tarîx û Cayê Şehadetî: 2ê Hezîrana 2022yî / Zap

Nameyê Qodî: Şerzan Hingirvan Name û Peyname: Serkan Uçkun Cayê Bîyayîşî: Îstanbul Maye-Pî: Nesîbe – Hîkmet Tarîx û Cayê Şehadetî: 2ê Hezîrana 2022yî / Zap

 

Embazê ma Bager Gever de dadîya xo ra beno û 2013 de tewrê gerîlayan beno. Embaz Bager 2015 de Xakûrkê de perwerde gêno û dima vera DAÎŞî Rojawan de şer keno. Embazê ma  Bager tîya de rayêk bi giranî birîndar beno la bi xîretî agêreno têkoşînî. Embaz Bager nê prosesê şerî de tecrubeyanê pîlan visneno destî û sey fermandarêkî agêreno koyan. Embazê ma Bager Zap de 2019 de tewrê xeylêk hemleyan beno û fermandarîya çalakîyanê serkewteyan keno.

Embazê ma Bager 2020 de reyna beno birîndar û reyna agêreno mewzîyê xoverdayîşî. Embaz Bagerî bi qerardarî beno teqîbkerdoxê rayraşîyayîşê Zîlane. Embaz Bager 2021 de hêrişanê vera Zapî de rolanê pîlan ano ca. Hêrişanê 14ê nîsane dde zî tunelanê şerî yê Şehîd Berxwedanî de fermandarîye keno û nêverdeno dişmen Girê Şehîd Şahînî de leşkeran bîyaro war. Embazê ma  Bager pa embazanê xo Şehîd Şahîn de zaf îşxalkeran ceza keno û hêrişanê kîmyewîyan de zî taktîkanê afernayoxan aver beno.

Embazê ma Bager 47 rojan keno ke dişmen ser nêkewo û peynî de zî tay embazanê xo şaweno. Embazanê xo yê bînan Avzeme, Arîne û Şerzan reyde o dersêka tarîxîye dano dişmenî ro. Embazê ma Bager bi nê hawayî beno fermandaro sembol ê Hemleya Bazanê Zagrosî.

Embaza ma  Avzeme Tirbesipîyê de dadîya xo ra bena û hêverî a xebatanê Şorişê Rojawanî de ca gêna. Embaza ma Avzeme 2014 de verê xo dana koyan û tewra gerîlayan bena. Embaze Avzeme perwerdeyan ra dima bena fermandare û embazanê xo zî perwerde kena. Embaza ma Avzeme 2019 de mîyanê Hêzanê Taybetan de ca gêna. A sey fermandarêka YJA-Starî qetî cuyêka asane qebul nêkena û tim erkan gêna xo milî.

Embaza ma Avzeme 2021 de tewra xoverdayîşê Avaşîn û Zapî bena û tecrubeyanê pîlan visnena destî. A hêrişanê 14ê nîsane de zî Warê Xoverdayîşî yê Şehîd Şahînî de şer kena û sey fermandarêka YJA-Starî tim vernî de ca gêna. A zaf çalakîyanê serkewteyan de ca gêna û vera dişmenî gêna. A pa embazanê xo çalakîya fedayîye kena û Zap vurnena kena kelaya xoverdayîşî.

Embaza ma  Arîne Kobanê de dadîya xo ra bena û 2015 de tewra gerîlayan bena. Embaze Arîne vera DAÎŞî Şingal de şer kena û mîyanê Hemleya Medîbanî de ca gêna. Embaze Arîne nê prosesî de zaf reyî birîndar bena û la bi lezî agêrena cepheyî. Embaza m Arîne dima sey fermandarêka YJA-Starî agêrena koyan. A 2020 de derbazê Zapî bena û tîya de pê çêrî, tewir û terzê xo yê pirodayîşî bena çimeyê hêzî yê embazanê xo. Warê Xoverdayîşî yê Şehîd Şahînî de a şina dişmenî ser û dest nana çekanê dişmenî ser. Embaza ma Arîne tewirê xo yê xoverdayîşî pê çalakîya fedayîye tacîdare kena û bena sembolanê Bazanê Zagrosî ra yewe.

Embazê ma Şerzan mîyanê keyeyêkê mûşijî de Îstanbul de dadîya xo ra beno û 2015 de tewrê gerîlayan beno. Embazê ma Şerzan Şingal û Rojawan de vera DAÎŞî şer keno û azadîya Şingalî ra dima zî reyna verê xo dano koyanê Kurdîstanî. O Cîlo de di serran pratîk keno û 2020 de derbazê Zapî beno.  Embazê ma Şerzan Zap de tewrê xeylêk çalakîyanê serkewteyan beno. Tewr peyên o Warê Xoverdayîşî yê Şehîd Şahînî de pa embazanê xo Zap vurneno kelaya xoverdayîşî. Embazê ma Şerzan mîyanê çêranê Hemleya Şorişgêre ya Bazanê Zagrosî de ca gêno û beno sembolanê ci ra yew.

Embazanê ma Bager, Avzeme, Arîne û Şerzanî pê terzê xo yê Apogîrî, tewir û marîfetê xo yê şerî warê Zapî reyna vurna kelaya xoverdayîşî û rayîr nêda dişmenî. Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê. ''