Gerîlayan Xakurkê de da îşxalkaran ro: 4 eskerî ameyî kiştene

HPG’yî da zanayene ke gerîlayan Xakurkê de vera artêşa Tirkî çalakîyî viraştî, 4 eskerî ameyî kiştene.

Merkezê Çapemenî û Îrtîbatî yê HPG’yî bi eşkerayîyêk detayê çalakîyanê gerîlayan rayapêroyî dir pare kerdî.

Eşkerayîye de nê ameyî vatene: ‘’Hêzanê ma çarçeweya Hemleya Şorişgêre ya Şehîd Bagêr û  Şehîde Ronya de 1’ê Tebaxe de herêma Xakurkê ya Wareyê Pawitişî yê Medya de vera îşxalkaran di çalakîyê hemwextî viraştî. Hêzanê ma Qilê Şehîd Botanî de eskerê ke ameyîbî cakerdene hedef girewtî. Pirodayîşo bitesîr de di eskerî ameyî kiştene. Qilê Şehîde Sarya de zî yewîyêka nimiteye ya dişmenî ameye pirdayene, di eskerî ameyî kiştene. Yewîyanê ma yê ke çalakîyî viraştî weşûwar resayê cayê xo.

Gever de Operasyon

28’ê Temmuze de artêşa Tirkî ya îşxalkare herêma dewanê Balayanê Cêr û Balayanê Corî ya pabesteyê qezaya Geverî ya Colermêrgî de operasyonêk da destpêkerdene. Heman roje de saetanê şanî de herême ameye bombardûmankerdene. Operasyon 31’ê Temmuze de peyser ancîya. Derheqê operasyonî de zanayîşo ke bikewê ma dest ma do rayapêroyî dir pare bikerê.

Tendurek de Pêkewtiş

27’ê Temmuze de Gîyadîno ke herêma Tendurekî de yo de mabenê hêzanê û eskeranê dişmenî de pêkewitş vejîya. Pêkewtiş de di embazê ma yê ke derbeyê girdî dayê dişmenî ro bi şerkerdişê qehremankîyî şehîd bîyî. Nasnameyê embazanê do rayapêroyî dir bêrê parekerdene.

Hêrişê Hewayîyî

1’ê Tebaxe de teyareyanê şerî yê artêşa Tirkî herêma Karkerî yê Zapî bombardûman kerd.  Netîceya hêrişî de vînîbîyayeyê ma çîn ê.''