Komêka gerîlayanê Yewinanê Pawitişî yê Rojhelatê Kurdîstanî (YRK) koyanê Kurdîstanî de Newroze fîraz kerde. 

Şayîye ra verî Endamê Fermandarîya YRKyî Şîyar Şevgerî girîngîya Newroze ser o qisey kerd. Şevgerî da zanayene ke na Newroze Newroza 50. ya Têgêrayîşê Azadîye ya. Şevgerî vist vîrî ke dewletê îşxalkerî vera çar parçeyanê Kurdîstanî hêrişanê giranan kenê la vera nê hêrişan gerîlayî her ca de xo ver danê. Şevgerî dima bale ante tecrîdê vera Rayberê Şarê Kurdî Abdullah Ocalanî ser û ard ziwan ke ê do heta ke Ocalanî azad bikerê têkoşînê xo rê dewam bikerê.

Şevgerî vat: ''Senî ke şarê Rojhelatê Kurdîstanî 1999 de wayîrê Rayber Apoyî vejîya ganî serra 50. ya Newroze de zî wayîrê Rayber Apoyî vejîyo. Ma sozê xo newe kenê ke wayîrê şehîdanê xo, şarê xo û têkoşînê 50 serrî yê Rayber Apoyî vejîyê û bi azadîya Rayber Apoyî serfîrazîye tacîdar bikerê.''

Qiseykerdişê Şevgerî ra dima gerîlayan bi sloganê 'Bê serek cuye nêbena' adirê Newroze vist ta û dormeyê adirî de bi deyîran govende girewte.