Gerîlayanê Azadîye yê Kurdîstanî Şerzan Cûdî û Dîcle Nurullah bi wesîleya serrgêra 28.  ya şehadetê Zeynebe Kinaci (Zîlane) ya ke 1996 de Dêrsim de çalakîya fedayîye kerde, ANFyî rê erjnayîşî kerdî.

Gerîlaya YJA Starî Dîcle Nurllah: Embaze Zîlane 1972 de Meletî de yena dinya, bi bawerîya elewîyan û kulturê kurdan bena pîl. Unîversîte de beşê weşîye wanena. Wextêk mîyanê sîstemî de bimano zî kulturê komelî ra dûrî nêqilyena ra. Raştîya cinîya kurde, raştîya şarê kurdî, raştîya komelî û sîstemî fam kena. 1994 de Adana de Apoyîyan nas kena û mîyanê xebatan de ca gena. 1995 de Dêrsim de tewrê ARGKyî bena. Embaze Zîlane wextê kilmî de Rayberîye nas kena û fam kena. 1996 de Dêrsim de bi çalakîya fedayîye mojnena ke senî pabesteya Rayberîye ya. Ma zî sey gerîayanê YJA Starî xeta têkoşînî de ya ke Zîlane afirnaye têkoşîn kenê. Ewro koyanê Kurdîstanî de bi hezaran Zîlane est ê. Ma sey hemrayanê Zîlane Zap, Metîna, Xakurkê û xeylêk waranê Kurdîstanî de vera dişmenî şer kenê. Se beno wa bibo ma do embaze Zîlane mîyanê têkoşînê xo de bidê ciwîyayene.

Gerîlayê HPGyî Şerzan Cûdî: Şehîde Zîlane 1996 de vera hêrişanê serê Rayberîye çalakîya fedayîye kerde. Wexto ke embaze Zîlane  çalakîye kerde vera şarê kurdî û Rayberîye hêrişê girdî bibî. Wexê wina zorî de embaze Zîlane serkêşîye kerde û çalakîya fedayîye kerde.Hemra Zîlane rêxistine de zaf kahan nêbî, embazêka newî bî û şervanê yew serre bî. Seba ke wextê wina kilmî de Rayberîye nas ker û wina pabesteya Rayberîye û partî bî kadroyan  û şarî ser o zaf tesîr kerd. Bi çalakîya xo heme dinya de estbîyayîşê cinîya kurde û şarê kurdî mojna ra. Sere de cinîyê kurdî mesajo pîl da cinîyan ê dinya, mesajê cuyeyêka azade bî. Manîfestoya cuyeya raştî bî. Zîlane vengê heme merdimîye bî. Çimeyê zanayîşê ci Rayber Apo bi ke felsefeya cuyeya azade yo. Embaze Zîlane mektubê xo de yo ke verê çalakîye nuşt, vana 'Werîkna teberê ganê ma de yewna çîyê ma bibiyênî ke ma bidayêne'. Na eslê xo de yew manîfesto ya. Ma zî xeta Zîlane de rayra şinê û ma do tim a xete de bi.