Gerîlayanê ke xoverdayoxanê grevê vêşanîye yê Başûrî rê mektûbe nûşte vat, “Bi çalakîya şima kînê ma yê hemverê dişmenî hîna bi vêşî. Tena yew amacê ma esto, ma do pêro pîya biresê serfirazîye.”
Gerîlayanê HPG-YJA Star’î Nasir Yagiz, endama Meclîsê Îştarî Fadîle Toke û Herêm Mehmûdî yê ke Başûrê Kurdistanî de grevê vêşanîye de yê, înan rê mektûbe şirawite. Fadîle Toka ke 107 rojî yo grev de ya vat bi mektûba gerîlayan aye zaf kêfweş bîya û vat, “Sere de gerîlayan, ez her kesê ke çalakîya ma rê paştî danê rê spas kena û silamanê xo vana.
Ez hîs û fikiranê xasekan ê şerwananê ke koyan de xover danê xelata Rayber Apoyî kena. Çunke Rojakewtena Mîyanêne de xoverdayoxo tewr pîl Rayber Apo yo. Hêzê şarê Kurdî yo ewilên ê pawitişî gerîla yo. Ma bi înan serberz ê. Do serfirazî yê ewladanê Kurdan bo.”
Ma Kîşta Şima de yê
Qismêkê mektûba ke bi nameyê gerîlayanê HPG-YJA Star’î xoverdayoxanê grevê vêşanîye rê ameya nûştene û tede îmzaya Vîyan Raperîne esta wina yo:
“Seba embazanê ercayeyan, Herêm Mehmûd, Nasir Yagiz û Fadîle Toke. Verê her çîyî ma koyanê Kurdistanî ra Herêm Mehmûd, Nasir Yagiz û Fadîle Toke rê silamanê xo yê tewr german şirawenê, xoverdayîş û serfirazîya şima pîroz kenê. Ma zî paştî danê xoverdayîşê şima, amacê ma yew o, ma do pêro pîya biresê serfirazîye.
Nuqtaya ke mucadeleyê rayber Apoyî resayo ci şaro Kurd reyna kerd gane, umîdê azadî û serfirazîya ci kerd vêşî. Naye ra heverê rayber Apoyî de dişmenî û tecrîd hîna ame vêşîkerdene. Ganî bizanê ke nê halî de zî zerrîya mîlyonan merdiman bi îdeolojîya rayber Apoyî dana piro.
Seba Şar û Ciwananê Başûrî Vengdayîş
Ma bi rayîrê na mektûbe veng danê şar û ciwananê Başûrê Kurdistanî. Bi rayber Apoyî şerê Birakujî qedîya. Şaro Kurd hetê dinya ra ame naskerdene û felsefeya ci dinya de vila bî û dinya lerznaye. Domanê şima Vîyan Sorane, Sîrwan, Dêrsim û bi hezaran bi fikranê rayber Apoyî seba na dewa canê xo feda kerd. Ganî şima seba ameyoxê xo hendî bibê wayîrê tewirêk. Wareyê Mama Rîşê Germîyan de ciwanêk seba rayberê xo canê xo feda keno. Na bêvengî tarîxê nê şarî ra dûrî ya. Tavilî nê tewirî ra fek vera bidê, dorê rayber Apoyî de bêrê têhet, welat û ciwananê xo rê wayîr vejîyê.
Tewrê Mucadeleyê Pîrozî Bibê
Ciwanan rê vengdayîşê ma no yo; biewnîrê şehîdanê Şêladizê û Dêrelokê ra, biewnîrê şehîdanê Qendîlî ra û biewnîrê Nasir, Herêm, Denîz, Îmam, Gulistan, Fadîle û bi hezaran xoverdayoxanê bînan ra. Destê xo bidê serrê zerrî û wijdanê xo, na bêvengîye biqedînê û tewrê mucadeleyê pîrozî bibê. Bêguman ma do pêro pîya biresê amacê xo û bi ser bikewê. Ma do azadîya rayber Apoyî şehîdan rê, şarê xo rê û hemeyê merdimîye rê xelate bikerê.”
