Merkezê Îrtîbatî û Çapemenîye yê HPGyî da nasnameyê gerîlayêkî eşkera kerd û nê pare kerdî:

''Ewlado erjîyaye yê şarê serhildanî yê Mêrdînî, fermandaranê serkêşan ê partîya ma PKKyî ra hemrayê ma Demhat Bêdar 28ê sibata 2020î de Dêrsim de netîceya hêrişê dişmenî de tewrê kerwanê şehîdan bi. Hemrayê ma Demhatê ke her cayê Kurdîstanî de gerîlatîye kerde, bi têkoşînê xo yê bêhempayî yê vera dişmenî morê xo da tarîxê ma ro.

Ma keyeyê hemrayê xo yê qehremanî û heme şarê Mêrdînî rê serweşîye wazenê. Nasnameyê hemarayê ma Demhat Bedarî wina yo:

Hemrayê ma Demhat sey endamêkê eşîrê Torî Nisêbînê Mêrdînî de yeno dinya û Îstanbul de beno pîl. Rixmo ke herra welatî ra dûrî yo wayîrê kultur û erjanê Kurdîstanî vejîyeno. Hemrayê ma Demhat gama ke wazeno tewrê sefanê gerîlayan bibo hetê dewleta tirke ra yeno tepiştene û 6 aşmî zîndan de maneno.2002 de reyna verê xo dano koyanê Kurdîstanî û tewrê gerîlayan beno. Sere de Botan, Mêrdîn û Dêrsim, her cayê Kurdîstanî de gerîlatîye keno. 2005 de verê xo dano Herêmanê Pawitişî yê Medya û  tewrê Hêzanê Taybetan beno. 2009 de reyna agêreno Vakurê Kurdîstanî û heta 2013yî tîya maneno û dima ra agêreno Herêmanê Pawitişî yê Medya. 2017 de reyna verê xo dano Vakurê Kurdîstanî û Dêrsim de ca dano xo. Dêrsim de sey fermandarê serkêşî hîrê serrî pîya bi embazanê xo têkoşîno destankî dano.

Mîlîtan û fermandarê ma yo serkêş hemra Demhat o ke xeta xoverdayîş û serkewtişî yê PKKyî pratîk de da ciwiyayêne, do bi mîrasê xo yê têkoşînî tim rayîrê ma roşn bikero."