Dewrê zanistî û teknolojî de dewletî bi teknîkê xo tewrê warê şerî benê. La tek hêzo ke binê hêrişanê kîmyewî û nukleran de teknîkê xo aferneno hêzê gerîlayan o. Coka artêşa NATOyî ya tewr pîle ya diyîne verê gerîlayan de bêçare mende. Na afernayoxîye seba pêro dinya bîya meraq. Çar serrî yo dewleta tirke ya îşxalkere bêmabên hêrişê Herêmanê Pawitişî yê Medya kena. Dişmen çeka kîmyewîye û nuklere şuxilnena. Gerîlayî teyna bi xoverdayîşî ney bi çalakîyanê xo yê xurtan zî cewab danê hêrişanê dişmenî.

Dewleta tirke ya îşxalkere her roje bi seyan hêrişan kena. Mîsal 3yê hezîrane de 10 reyî bi teyarayanê şerî, 281 reyî vi çekanê giranan, 8 reyî bi gazanê kîmyewîyan, 6 reyî bi teqaberanê qedexekerdeyan û reyêke zî bi droneyê çekdarî hêriş kerd. Rixmê nînan zî dişmen pê gerîlayan nêeşka. Gerîlayan çalakîyî kerdî, çar îşxalkerî ceza kerdî, 3 îşxalkerî birîndar kerdî. Serkewtişê gerîlayan hetê kamerayan ra ame qeydkerene.

Bêguman nê taktîkî û xoverdayîşê gerîlayan çimeyê xo Rayberê Şarê Kurdî Abdullah Ocalanî ra gênê. 25 serrî yo Îmrali de şerê mendiş û merdişî yeno kerdene. Gerîlayî nê şerî ra hêzê xo gênê. Gerîlayan bi ruhê perwerîya Rayberîye taktîkê xo afernayî. Hêzê gerîlayan ê ke bi şerê xo teyna seba şarê kurdî ney seba pêro şaranê bindestan bîyê hêvî bi taktîkanê xo yê afernayoxan serkewtişî anê ca. Merdim eşkeno vajo ke gerîlayê azadîye yê Kurdîstanî bîyê nefesê hêvîya azadîye. Gerîlayî bi afernayoxîya xo, averberdişê taktîk û metodanê xo û hêzê xo yê vurnayîşî nê nefesî hîrayêr kenê.