Hêrişê dewleta tirke ya îşxalkere yê vera Herêmanê Pawitişî yê Medya dewam kenê. Gerîlayê Azadîye yê Kurdîstanî bi taktîkanê afirnayoxan hêrşanê dişmenî betal kenê. Gerîlayê ke bi çalakîyanê xo yê rojanê peyênan xeylêk hedefê dişmenî îmha kerdî bitaybetî mabênê tarîxanê 1-6ê hezîrane de çalakîyê bitesîrî kerdî. Gerîlayan mabênê nê tarîxan de Avaşîn, Zap û Metîna de vera leşkeranê tirkan çalakîyê bitesîrî kerdî û derba pîle daye  dişmenî ro û 11 leşkerî ceza kerdî. Dewleta tirkê vera xoverdayîşê gerîlayan bêçare ya.

Her çiqas dewleta tirke bi reklaman xo hetê leşkerî û teknîkî ra serkewte ramojno zî raşt no nîyo. Raşt oyo ke gerîlayî rixmê reştanê zehmetan hêzê leşkerî û teknîkî yê dewleta tirke betal kenê. Gerîlayî serrgêra Hemleya 1ê Hezîrena de Avaşîn de çalakîya sabotajî kerde. Gerîlayanê ke aşma fedayîyan hazîrane de çalakîyê bitesîrî kerdî, mesajo bimana da dewleta îşxalkere. Goreyê dewleta tirke nê herêman de bitaybetî herêmanê Zap, Metîna û Avaşîn de gerîlayî  nêmendê! La her roje gerîlayî nê waran de çalakîyanê dahîna girdan kenê. Bi çalakîyanê Avaşînî eşkera yeno vînayene ke gerîlayî ça bene wa bibê eşkenê şirê dewleta tirke ser.

Herêma Metîna de dewleta tirke menga gulane ra hêrişê xo zêdînayî. Narey metodanê neweyan ceribnenê. Wazenê ke gerîlayan erazî de îmha bikerê, bikerê bêtesîrê. Hedef kenê ke peyra hêrişê tunelanê şerî bikerê. Çar serranê peyênan de seba ke bikewo tunalenê şerî metodo ke dewleta tirke nêşuxilnayo nêmend.  Heta tunelanê şerî ameyî û veng agêrayî. Waşt ke bikewê mewzîyanê gerîlayan la ameyî îmhakerdene. Narey wazenê xo erazî de biceribnê la no metod zî bênetîce maneno. Gerîlayê Azadîye yê Kurdîstanî şer û çalakîyanê xo domnenê. Dewleta tirke ya ke waştişê ci nîno ca metodanê bêehleqan şuxilnena. La na raştî ameya îspatkerdene ke qet hêzêk nêeşkeno vera îradeyê gerîlayan vindero.

Metîna de gerîlayî derbanê girdan danê dişmenî ro. Gerîlayê ke felsefeya Rayber Apoyî ra îlham genê leşkeranê tirkan ser û bin kenê ke paştîya ci hêzê ci yê teknîkî ra pêt a. Metîna, Avaşîn û Zap nimûneyê tewr pîlî yê nê yê. Leşkerê tirkan hinî nêeşkenê game bierzê herra Kurdîstanî, nêeşkenê mewzîyanê xo caverdî. Cayê ke dewleta tirke vana ''hinî ûca de PKK çîn o'' gerîlayî derbanê girdan danê mewzîyanê dişmenî ro. Dîmenê ke gerîlayan antî înan de zî yeno vînayene ke leşkerê tirkan şok benê û nêzanê biremê sera şirê. Gerîlayî bi taktîkê modernî yê gerîlayan ver bi serkewtişî şinê. Dewleta tirke hinî nêeşkena binkewtişî ra bixelisîyo. Gerîlayî hem erazî de hem hewayî ra danî dişmenî ro.Coka leşkerê tirkan her gama xo de benê hedefê gerîlayan.