Tunelanê şerî yê Warê Xoverdayîşî yê Girê Ortê yê herêma Metîna de vera artêşa dewleta tirke ya îşxalkere  têkoşîno tarîxî yê Gerîlayanê Azadîye yê Kurdîstanî dewam keno. Artêşa îşxalkera ke nêeşkayî nê xoverdayîşî bişikno vera tunalanê gerîlayan çekê kîmyewîyî û teqaberê qedexeyî şuxilnayî. Netîceya nê hêrişan de çar gerîlayî şehîd bîyî.

Gerîlayî Şahîn Armanc û Rojda Zagros înanê ke têkoşînê tarîxîyî yê Warê Girê Ortê de ca girewt ê zî raştê hêrişê çekanê qedexeyan ameyî. Gerîlayê ke bîyî şahîdê sûcanê şerî yê dewleta tirke qalê hêrişê dewlete û têkoşînê gerîlayan kerd.

Rojda Zagros: Dişmen wextêk nêeşka nêzdîyê tunelan bibo û verî bi teqaberan hêrişê tunelan kerd. Dima ra gazê hesran û gazê bêboye ke nefesê merdimî birnenî şuxilnayî. Ma zanayêne ke ê çekanê kîmyewîyan şuxilnenê. Gazê rengin û bêboye şuxilnayêne ke nê gazan merdim kerdêne bêhale. Badê nê gazan çend saetî sareyê ma dejayêne û linê ma bîyêne kung, ma bîyênî bêhale.

Ma zî vera gazanê kîmyewîyan tedbîrê xo grewtêne. Ma maske kerdêne pa û ya havlû ya zî yew pînê kerdêne hî antêne serê maske.  Ma feydeyê nê dî. Boya gazan cîya cîya bî. Çim û pirnêkê ma vêşnayêne, ma nêeşkayêne nefes bîgêrê. Xora cade zerrîya merdimî qelibîyayêne. Dişmen rixmê heme hêrişanê xo ser nêkewtêne. Coka her roje dahîna zaf ameyênî ma ser. Nizdê di mengan saete 11.30 ra heta  16.30 bi teqaberan hêrişê berê tunelî kerdêne û semedê teslîmbîyayîşê veng dayêne ma. Embazan bi bombayan cewabê vengdayîşê teslîmbîyayîşî dayêne. Fermandarê înan bi vatişê 'eke şima teslîm mebê ma do çeka nukleer bişuxilnê' tehdît kerdêne.

Dişmenî polîtîkayê şerê taybetî rayra berdêne la qet embazan ser o tesîr nêkerdêne. Qet çewî goş nêdayêne vatişanê înan. Dişmenî dima çeka nukleerî zî şuxilnaye. Tewr peynî de 18 kanûne de hêrişêko pîl kerd û reyna çekê kîmyewîyî şuxilnayî. Badê hêrişî dû kewt zere. Ez o wext xora şîya û badê 7 saetanê ameya xo. Ez rîyê gazê kîmyewîyî ra felç bîya. Têna ez eşkayêne çimanê xo abikerî. Mi embazê xo nêsarinayêne.Gama ke mi vat ez wirzî xo ser, mi virit 10-15 deqayî ez xora şîya. Ganê mi zaf  dejayêne. Rixmo ke ma binê tesîrê gazan de mendî embazan reyna bi bombayan cewabê vendayîşê dişmenî da. Verî ke embazî şehîd bîyî mayînî berê tunelî de ca kerdbî, hela ke dişmenî hêriş kerd ma zî mayînî teqnayî. 2 leşkerî binê tesîrê teqayîşî de mendî.

Hedefê mi oyo ke ez xeta embazanê ke şehîd bîyî de têkoşîn bikerî. Ez nê rayîr de qet asntengêkî nas nêkena. Ma teberê têkoşînî û qesasgirewtişî de çîyê bînî qebul nêkenê.

Şahin Armanc: Dişmenî 23ê temuza 2023yî de vera Warê Xoverdayîşî yê Girê Ortê  hêrişêk da destpêkerdene. Ma zî vera nê xeylêk çalakîyî kerdî. Dişmen hela ke ame tay darbeyê pîlî werdî.  Çunke xora ma hazir bî. Ma çalakîyê bitesîrî kerdî. Menga temuze bî, hewa germin bi û teyarayê keşîfî gerayêne. Bado ke dişmenî hêriş da destpêkerdene ma zî bi çekanê giranan çalakîyî kerdî. Nê çalakîyan de leşkerî merdî. Moral û motîvasyonê ma ca de bi. Dişmen tersî ra 2-3 mengî nêeşka bêro nêdzîyê berî. Ma çalakîyê sabotajî kerdêne. Dişmen rîyê çalakîyanê ma ra nêeşkayêne bêro nêzdî.

Bado ke dişmenî berê ma tesbît kerd, dest pê şuxilnayîşê çekanê kîmyewîyan kerd. Gazê rengînîn şuxilnayêne ke çim û pirnekê ma vêşnayêne. Ma nêeşkayêne çimanê xo abikerê. Ma xo pê maskeyan pawitêne. Tay gazî bibî ke verî zaf zor nêdayêne merdimî la dima merdim senî ke bifatisîyo. Gazê kîmyewî yo zaf bitesîr bi. Hela ke merdim xo leqnayêne xora şîyêne. Xora eke merdim çend saete mîyanê ê gazî de bimano şehîd beno.