Serkêşîya KCD, DBP, HDP, TJA, MED TUHAD-FED,MEBYA-DERî de bi şîarê ''Semedê çareyî ma ver bi Îmraliyî şinê''  6ê sibate de Qoser û Geverî ra  ver bi Gemlîkî do rayraşîyayîş bêro kerdene.

Qezaya Geverî ya Colemêrgî de ewro verê bînaya HDPyî de derheqê rayraşîyayîşî de eşkerayîye ameye dayene. Meclîsê Dayîkanê Haştîye, Komeleya Heqanê Merdiman, Komeleya Huqûqnasan a seba Azadîye û xeyêk kesî tewrê eşekrayîye bîyî. Eşkerayîye de dovîzê sey ''Tecrîd sûcê merdimîye yo'', ''Wa îmrali bêro qefilnayene'', ''Gever do tecrîdî bişikino'' û ''Birêz Ocalanî rê Azadîye'' ameyî kiriştene.

Hemserekê DBPyî ya Geverî Evlîya Alakanî bale ante tecrîdê serê Rayberê Şarê Kurdî Abdullah Ocalanî ser û vat: ''Şexsê şarê kurdî de azadkerdişê Rojhelatê Mîyanênî û heqê qederê xo tayînkerdişê ci yeno tecrîdkerdene. Bi tecrîdê serê Birêz Ocalanî şertê şerî xorî bîyî, rîyê butçeyanê şerî ra şar bi feqîr. Mîyanê dewlete de dizdîye, çeteyî gird bîyî.  Vera krîzan haştîya komelkîye hewce kena ke mifteyê ci destê Birêz Abdullah Ocalanî de yo. Seba ke no rayraşîyayîş Geverî ra dest pêkeno, ma sereberz ê. Grûba Geverî do 6ê sibate de saete 10:00 de verê bînaya ma ya qeza de ver bi Elbakî bêro raştkerdene.  Ma veng danê şarê xo ke vera şer û tecîrî hetê haştîye de yo,  wa tewrê nê raştkerdişê tarîxî bibo.''

Hetê bînî ra Îzmîr de zî endamanê HDK, HDP, DBP, TJA û EGE TUHAYDERî da zanayene ke ê do 14ê sibate de saete 12.00 de verê Edlîyeya Barakli ya Îzmîrî de eşkerayîye bidê û 15ê sibate roja çarşemeyî Îstanbulî ra ver bi Gemlîkî ra rayra şirê. Eşkerayîye de semedê tewrbîyayîşê rayraşîyayîşî ame vengdayene.