Tirkîya û Vakurê Kurdistanî de ke demokrasî û heqê merdiman nêmendê, bi nameyê nuqtayanê cigêrayîş û kontrolî, destûr nêno dayene ke şar bieşko xo rê bigêro. Raywanîyêka saetêk, rîyê nuqtayanê cigêrayîş û kontrolî ra çend saetan dewam kena.

Bajarê Kurdistanî kerdê sey zîndananê serakerdeyan. Sere de Colemêrg, Wan, Agirî, Îdir, Mûş, Bedlîs heme bajaranê Kursitanî de bi hezaran qereqolî û kalekolî ameyî viraştene. Serê rayîrê mabênê bajaran de zî nuqtayê cigêrayîş û kontrolî yê neweyî ameyî viraştene. Qismêkê nê nuqtayan de qorucîyî estê, tayênan de zî polîs û leşkerî.

Serê 500 Metreyî de Nuqtayêk Esta

Serê tayê rayîran de nuqtayê kontrolî 500 metreyî ra reyêk estê. Her nuqtaya cigêrayîşî de nasnameyê merdiman yeno persayene, merdimî yenê sehnayene û wesayîtî yenê kontrolkerdene. Nuqtayanê kontrolî de rixmo ke sûcêk nêameyo kerdene zî bi hezaran TL ceza dîyena merdiman. Bi ameyîşê wisarî muameleyê ke kemîyê halê îstîsnaîyî nêyê bîyî vêşî.

Rayîrê Saetêk Ge-ge Beno 5 Saetî

Rayîrê mabênê Wan û Agirî rixmo ke 200 km yo, mabênê Wan-Patnosî de 5 nuqtayê cigêrayîşî, mabênê Patnos-Tûtaxî de 3 nuqtayê cigêrayîşî, mabênê Tûtax-Hamûrî de 2 nuqtayê cigêrayîşî û mabênê Hamûr û Agirî de zî 2 nuqtayê cigêrayîşî estê. Rîyê nê nuqtayanê cigêrayîşî ra rayîrê saetêk beno 5 saetî. Her nuqtayanê cigêrayîşî de cezayê cîyayî yenê birnayene. Bi heman hawayî heqê azadîya geyr û seyranî yo ke bi qanûn ameyo pawitene zî yeno astengkerdene.