Vervatoxa TJA Ayşe Gokkan pare kerd ke Ocalan bi felsefeya xo ya vera sîstemê kapîtalîstî bi hêvîya şaran. Naye ra zî hêzê kapîtalîstî bi tecrîdê 21 serre wazenê Birêz Ocalan û komel yewbînan ra cîya bikerê û hêvîya azadîye pûç bikerê.
Vervatoxa Têgêrayîşê Cinîyan ê Azadan (TJA) Ayşe Gokkan derheqê tecrîdê Rayberê Şarê Kurdî Abdullah Ocalanî de qisey kerd. Gokkane ard ziwan ke tecrîd vera merdimîye yo. Gokkane vat: ''Birêz Apo Rayberê Şarê Kurdî yo û ganî mahkemeya mîyanneteweyîye de bêra hukmkerdene. Çunke Rayber Apo ge ge sey sucdar yeno dîyene, ge ge ey reyde pêvînayîşî yenê kerdene. Nê metodê ke vera Rayber Apoyî yenê xebitnayene pêro pûç ê.
Ganî ma bi nê hawayî biewnê ci ke komplo têna vera Birêz Ocalanî ney vera şarê ma û cinîyan zî ame kerdene.
Tirkîya têna xo bi xo tecrîd nêana ca. Neteweyê Yewbîyayeyî, Parlamentoya Ewropa, Dezgehê Vera Îşkenceyî, Konseya Ewropa pêro vera tecrîd bêveng ê. Ma înan sey hemkarê tecrîdî pênase kenê. Têna bi eşkerayîyan tecrîd nêno şiknayene, ganî têkoşînêko pîl bêro kerdene.
Dezgehê vera îşkenceyî CPT pabesteyê nê dezgehanê Ewropa yo. Pêro dezgehê Ewropa qala demokrasîyî kenê la wexto ke babete Ocalan biba bêveng manenê. Dewleta tirke zî bi tecrîdî pêro heqanê huqûqîyan binpay kena.
Hêzê paramîlîterî tecrîd danê dewamkerdene. Derbeya 15ê temmuze de vat 'FETOyî waşt Îmrali ra Birêz Ocalan biremno. Nê hêzê paramîlîterî ge ge wazenê ke mabênê şarî û Ocalanî de cîyatîye bikerê. Bi destê zaf dewletan hêzê paramîlîtî sey OSO, DAÎŞ, El Qaîde, Boko Haram ûsn. ameyî awankerdene. Komplo zî destê înan ra ame kerdene û tecrîd zî destê înan ra yeno dewamkerdene. Nê wazenê ke hêvîya azadîye pûç bikerê.
Hînî sîstemê kapîtalîstan îflas kerd. Birêz Ocalanî binê nê tecrîdî de hende erjî viraştî û pêro xîretê nê hêzan pûç bîyî.''
