Seba qedîyayîşê tecrîdê serê Rayberê Şarê Kurdî Abdullah Ocalanî çalakîyê grevê vêşanîye yê ke Hewlêr, Silêmanî, Mexmûr û Kelar de yenê kerdene dewam kenê. Grevê vêşanîye yê Nasir Yagizî ke Temsîlkarîya HDP’yî ya Hewlêrî de dano dewamkerdene roja xo ya 138’ine de yo. Çalakîya ke Komela Karkeran a Mezopotamya ya ke Silêmanîye de dewam kena zî roja xo ya 115’ine de ya, Kelar de grevê vêşanîye yê Herêm Mehmûdî roja 43’ine, yê endama Meclîsê Herêma Germîyanî yê Têgêrayîşê Azadîye Gulebax Celale zî roja 22’ine de yo. Cayêk ke tede grevê vêşanîye dewam keno zî kampa multecîyan a Mexmûrî ya. Grevê vêşanîye yo bêdem-bêagêrayîş o ke hetê endama Koordînasyonê Meclîsê Îştarî Fadîle Toke ra 16’ê Teşrîna Peyêne de dabi destpêkerdene zî kewt roja xo ya 113’ine.

Hewlêr

Problemê weşîye yê Nasir Yagizî ke Hewlêr de 138 rojî yo grevê vêşanîye de yo roje bi roje hîna benê giran. Çalakîyê grevê vêşanîye yê bêdem-bêagêrayîşî yê ke temsîlkarîya HDP’yî de dewam kenê rê heta nika 300 kesan paştî daye. No hewte çalakîya grevê vêşanîye yê bêdem-bêagêrayîşî hetê grûba 69’ine ra yena dewrkerdene. Yagizo ke qerardarîya xo ya dewamkerdişê grevê vêşanîye her firsendî de ano ziwan rixmê problemanê ci yê weşîye zî qerardarîya xo ra çîyêk nêkerda kemî. Yagizo ke kîlo kerda vînî problemê êyê dejê sereyî, vînayîş û şinawitişî çende şinê benê vêşî. Yagiz tewr peynî roja 26’ê Sibate amebi berdene bi nêweşxane, ancax tedawî red kerdebî û çalakîya xo rê dewam kerdibi.

Roja ewilêne ya çalakîya Yagizî ra seba ci paştdayîşê temsîlkaranê sazî û partîyan û şarê Vakur û Başûrî dewam keno. Kîşta KNK, Goran û PYD’yî de û xeylî partî, sazî û organîzasyonan de xeylî hunermend û roşinvîran zî Nasir zîyaret kerd.

Silemanî

Seba qedîyayîşê tecrîdê serê Rayberê Şarê Kurdî Abdullah Ocalanî Komela Karkeran a Mezopotamya ya Silêmanî de 12’ê Kanûne de grevê vêşanîye dest pêkerd. Nê grevê vêşanîye yê bidem-biagêrayîşî rê heta nika çar perçeyanê Kurdistanî ra 228 kesî tewrê ci bîyê û çalakîya bi grûba 58’ine dewam kena. Heta nika Tevgera Azadî, PYD, PADÊ, temsîlkarê Ewropa, KODAR, KJR, temsîlkarê Rojava, TEV-DEM, Kongreya Star, RJAK, hemserek û temsîlkarê Tevgera Azadî, KNK û xeylî sazî û organîzasyonî seba paştîdayîşî şîyî zîyaretê çalakîya Silêmanîye. Grevê vêşanîye yê Herêm Mehmûdî roja xo ya 43’ine, yê endama Meclîsê Herêma Germîyanî yê Têgêrayîşê Azadîye Gulebax Celale zî roja 22’ine de yo.

Memxûr

Şarê Mexmûrî zî veng da xoverdayoxan û Kanûne de dest bi grevê vêşanîye kerd. Heta nika 500 kesî tewrê grevê vêşanîye yê bêdem-bêagêrayîşî yê Kampa Mexmûrî bîyî. Grevo ke roja xo ya 113’ine de yo bi grûba 37’ine dewam keno. Endama Koordînasyonê Meclîsê Îştarî Fadîle 20’ê Çele de dest bi grevê vêşanîye yê bêdem-bêagêrayîşî kerdibi. Xoverdayîşê Toke roja xo ya 78’ine de yo.

Asayîşê PDK’yî hêrişê cinîyanê ke endamê Meclîsê Îştarî bîyî û 30’Ê Çele de verê Temsîlkarîya NY’yî yê Hewlêrî de çadire seba qedîyayîşê tecrîdê girankerdeyî yê serê Rayberê Şarê Kurdî Abdullah Ocalanî ronabî kerdibi.Hêzanê asayîşî yê PDK’yî bi heman hawayî 6’ê Sibate de hêrişê ê kesanê ke Hewlêr de xoverdayîşê grevê vêşanîye rayra berdêne kerd, çadira çalakwanan raşanabî û dest nabi serê tayê malzemeyanê çalakwanan.