3 çalakwanê ke hepisxane de seba wedaritişê tecrîdê Rayberê Şarê Kurdî Abdullah Ocalanî dest bi grevê vêşanîye kerdibî, dimayo ke ameyî veradayene keyeyê xo de qezaya Dêrîkî ya Çiyayê Mazî ya Mêrdînî de çalakîya xo rê  dewam kenê. Çalakîya Mahsûm Şenî roja 108’ine de, ya Gûrbet Ektîrene roja 98’ine, û ya Mûrat Aksînî roja 39’ine dewam kena.

Şen 108 rojî yo grevê vêşanîye de yo

Mahsûn Şeno ke 108 rojî yo grevê vêşanîye de yo, menga Hezîrane ya 2016 de Dêrîk de ame têpiştene û  kerd bi Hepisxaneyê Merdînî yê Tîpê E’yî. Şen 17’ê Nîsane de ame verdayene û a roje ra nata çalakîya xo keyeyê xo yê Dehlî yê Dêrîkî de dewam keno.  Şen persanê dejê velke, mobike û xovîrakerdişî ciwîyeno. Doktoro ke hetê Odaya Doktoranê Mêrdînî (MTO)  ra ameyo wezîfedarkerdene, her roje kontrolê weşîya Şenî keno û  hewcedarîyê ey ê bingeyênî hetê keyeyê ci ra yenê caardene.

Akin 25 rojî yo grevê vêşanîye de yo

Mahsûm Aksino ke Hepisxaneyê Mêrdînî yê Tîpê E’yî de dest bi grevê vêşanîye kerd û  dimayo ke ame verdayene, çalakîya xo keye de dewam keno. Aksin wayîrê 6 domanan o. Aksino ke Mehsûn Şenî reyde eynî dosya ra yeno muhakemekerdene, 1’ê Adare de dest bi grevê vêşanîye kerd. Aksin 25’ê Adare de ame verdayene û çalakîya xo keye de dewam keno. Nika persêka cîdî ya weşîya Aksinî çin a.

Gûrbet Ektîrene çalakîya xo keye de dewam kena

Gûrbet Ektîrene zî serra 2015 de ameye tepiştene. Hepisxaneyê Cinîyan ê Bakirkoyî de mende. 15’ê Çele de dest grevê vêşanîye kerd. 8’ê Adare de ameye verdayene û keyeyê xo yê Kanîya Gwîzê ya qezaya Dêrîkî ya Çîyayê Mazî ya Mêrdînî de grevê xo yê vêşanîye dewam kena. Kontrolê rûtin ê weşîya Ektîrene yenê kerdene û  persêka cîdî ya weşîya ci çin a.

Ame zanayene ke birayê Ektîrene yo ke dimayê  qedexeyê vejîyayîşî yê teberî yê bajarî de ame girewtene bi nameyê Mehmet Ektîrenî û xalê ci Abdurrahman Şimşek zî, Hepisxaneyê Mêrdînî yê Tîpê E’yî 1’ê Adare ra nata grevê vêşanîye yê bêdem û bêagêrayîşî de yê.