Odayê Muhendîsanê Înşaatî (ÎMO) yê Şubeyê Amedî Heyetê xo yê Pêroyî yê Dewrê 24ine odayê bînaya xo de viraşte. Hemsereka Kongreya Komelê Demokratîkî (KCD) Leyla Guven û xeylêk  tesîlkarê rêxistinê komelê yê sivîlî tewrê ci bîyî.

Serekê Şubeyê ÎMOyî Murat Demirî ard ziwan ke wextê AKPyî de warê karê înan ameyo texrîpkerdene û seba ke hukmat qezencanê kurdan xo rê sey tehlukê vîneno polîtîkaya şerî de israr keno.

Ma Kurd ê Nameyê Herra Ma Kurdîstan o

Guvene zî vat: ''Heta ke meseleya kurdî nêro çareserkedene problemî nêqedîyenê. Kam ke beno îqtîdar polîtîkaya dişmenîye ya vera kurdan rayra beno. Şima nêeşkenê 50 mîlyonî sey terorîstî îlan bikerê. Ma estê, ziwanê esto, nasnameyê ma esto. Ma kurd ê û nameyê herra ma Kurdîstan o. Hukmat kam ke înan ra nîyo sey terorîst name keno. Bananê şarî serê înan de rijneno. No welat de akedemîsyen, rojnameger, cinî, muhendîs heme bîyî terorîst. Kam ke vengê xo vejeno vanê terorîst. Dinya û komel zano terorîst kam o. Terorîst dewlet a  ke şarê xo vêşan verdena. Terorîst êyê ke bodrûmanê Cizîrî de merdimî vêşnayî û meyîtê Dayîka Taybete bi rojan kuçeyan de verda.

Bê Cinîyan Xelisyayîş Nêbeno, Bêcinîyan Cuya Nêbeno.

Guvene bi wesîleyê 21ê Sibate Roja Ziwanê Dayîke ya Dinya bale ante ser ke ziwanê kurdkî xeyrê dayîkan heta ewro ameyo û vat: ''Ma heme kombîyayîş û cuya xo de tirkî qisey kenê. Ganî ma têna bi kurkdî qisey bikerê. Pîya bi naye hûmara cinîyan kêm a. Ganî diwanî û meydanê bêcinîyan nêbê. Rojawan de şorişêk esto ke rayberê ci cinîyê. Tîya Amed do qey hûmara cinîyan kêm a? Coka ganî têkoşînê ma bêro xurtkerdene. Bêcinîyan xelisyayîş nêbeno, bêcinîyan cuya nêbeno.''