Erdlerzê Sîvrîce yê Xarpêtî ra dima munaqeşeyê erdlerzî dest pêkerdî. Teşrîna peyêna 1999î de dewlete şarî ra 34 mîlyar dolarî ra zêdêr bac girewt la wextê erdlerzê Xarpêtî de Serekê Kizilayî Kerem Kinikî bi rayîrê medyaya sosyale şarî ra hetkarîye waşte.

Reyna vejîya werte ke Başkentgazî bi rayîrê Kizilayî 8 mîlyon dolarî bexşê Weqfa Ensarî kerd ke bi îstîsmarê domanan bîye rojdem.

Wekîla Partîya Demokratîke ya Şaran (HDP) a Amedî Semra Guzel derheqê babete de qisey kerd.

Beşêkê qiseykerdişê Guzele wina yo: 

''Bacê ke seba erlerzî ameyî arêdayene ça de yê? Pêro hemwelatîyî naye persenî la hukmat cewab nêdano. Şarî peygoşîye hukmatî ra merdî û mexdur bîyî. Eşkera yo ke bacê erdlerzî seba şarî nêameyî xebitayene. Hukmat rewşa erdlerzî goreyê menfaatanê xo yê sîyasîyan xebitneno. Hukmat deje, travma û mergê şarî keno parçeyê sîyasetê xo. Heta nika zaf rêxistinanê HDPyî hetkarîye erşawite Xarpêtî. La pêro hetkarîya HDPyî ameye astengkerdene. Pêro hetkarîya bîne zî hetê Serekê AKPyî yê Xarpêtî ra ameye vilakerdene. Hetkarîya merdimîye kerde parçeyê sîyasetê xo. Dejanê şarî ra rant peyda kerd. Erdlerzê Xarpêtî ra dima Kizilayî vengdayîşê hetkarîye kerd la vejîya werte ke Başkentgazî bi rayîrê Kizilayî 8 mîlyon dolarî bexşê Weqfa Ensarî kerd. AKP welay sey yew şîrkete îdare keno. Wazenê partî û rêxistinê bînî zî sey înan têbigêrê. Her çi seba rant û menfaatê xo kenê.''