Cenayaza gerîlaya YJA Starî Kubare Heîizade (Rojda Cudî) ya ke 3 gerîlayê ke 24ê êlula 2019î de qezaya Licê ya Amedî de şehîd bibî ra yew a badê 6 aşman qezaya Bazîdî ya Agîrî de binê ablûqaya polîsan de ameye definkerdene.

Polîsanê ke dekewtişê bajarî de vernîya cenaza girewte destûr nêde bikewo bajar û bi  wesayîtanê zirxinan verê cenaza açarna Goristanê Bajarî yê Bazîdî. Derûdorê goristanî ame girewtene û destûr nêdîya ke hemwelatijî tewrê cenaza bibê. Cenazaya ke wecîveyê ci yê dînî ameyî caardene hetê hîrê kesan ra ameye definkerdene. Hetê bînî ra polîsan sermîyanê MEBYA-DERî tehdît kerdî ke cade bajarî ra vejê.