Têgêrayîşê Şorişgêrî yê Yewbîyayeyî yê Şaran (HBDH) derheqê serrgêra 3’ine ya awanbîyayîşê xo de eşkerayîyêka nuştekîye weşanaye.

Eşkerayîya Komîteya Rayberî ya HBDH’î wina ya:

“Seba xurtkerdişê şorişê yewbîyayî yê Tirkîya û Vakûrê Kurdistanî ma têkoşînêko gird da. Dêrsim ra heta Serhad, Behra Reş ra heta Amanosan, Efrîn ravheta Zap hêzanê ma bi cehdkerişêkê girdî têkoşîn kerd. Nê têkoşînî de endamê ma yê Komîteya Rayberîye, Fermandarîya Hempare zî tede zaf şerwanê ma heta fîşêka xo ya peyêne têkoşîn kerd û şehîd bîyî. Rejîmo faşîst dişmenê heme Kurd, Elewî, karker, kedkar, ciwan û şorişgêran o. Bi hêrişanê faşîzan no sîstem hîna zî nêreşto netîceyo ke wazeno û krîz dewam keno. Koalîsyonê faşîst ê AKP û MHP’yî bi teror û şerê psîkolojîkî cehd keno ke netîceyêk bikero labelê nêeşkeno. Faşîzm sînoranê xo keno hîra û amancê înan o yo ke Kurdî nêbê wayîrê statûyî. Seba vergirewtişê Rojawanî heme îxtîmalanê şerî keno ra xo ver. La krîzê ekonomî yo giran heme plananê koalîsyonê faşîstî xirab keno.

Faşîzm serranê verê ma de zî do tengasîye de bimano. Serra 2019’î seba hêzanê cimatî û sîyasî do serrêka krîtîke biba. Faşîzm teyna roja ewroyîne nê, wazeno ameyoxê ma zî do çin bikero. Seba naye zî ma vengdayîş heme hêzanê şorişgêr û demokratîkan rê kenê ke bêrê ma serra 2019’î de xoverdayîşî xurt bikerê û faşîzm bin bikerê. Vera faşîzmî tek rayîr têkoşîn o, xoverdayîş o.  Seba wedaritişê tecrîdê serê Rayberê Şarê Kurdî Abdullah Ocalanî, Leyla Guvene û girewteyê sîyasî dest bi xoverdayîşêko newe kerd. Seba naye zî no têkoşîn yeno manaya têkoşînê azadîye yê vera hêrişanê herême û qetlîaman. Bêrê ma nê xoverdayîşî xurt bikerê û bikerê îmkanêko sîyasî. Bêrê ma wareyan, kuçeyan, fabrîkayan, wendegehan û koyan bikerê kelayanê xoverdayîşî û têkoşînî gird bikerê.“