Merkezê Rayberdişî yê HDPyî bi eşkerayîyêke da zanayene ke dormegirewtişê şaristanan û hêrişê qirkerî yê 2015-2016î yê ke binê nameyê qedexeyê teberî de ameyî kerdene, barbarî, binpaykerdişê heqan û bêhuqûqî bîyî.

HDPyî pare kerd ke qedexeyê tebervejîyayîşî 16ê tebaxa 2015î de Gimgim de, 14ê kanûna 2015î de Cizîre de dest pêkerd û dima Silopî, Hezex, Dêrik, Nisêbîn, Gever, Gimgim, Farqîn û Sûr zî tede 11 şaristanan û 49 qezayan de dewam kerd.

HDPyî ard ziwan ke raporanê Neteweyan ê Yewbîyayeyan, Parlamentoya Ewropa, Meclîsê Parlamenteran ê Konseya Ewropa, Mehkemeya Heqanê Merdiman a Ewropa û xeylêk dezgehan de bale ameye antene nê qirkerdişan ser. Goreyê raporê Neteweyan ê Yewbîyayeyan 18 mengan de 2 hezar kesî merdî. Goreyê cigêrayîşan ê xoseran zî mîlyonêk û 500 hezar kesî heqê cuye, asayîş û azadîye ra bêbar mendî.

HDPyî îfade kerd ke wextê qedexeyê tebervejîyayîşî de hêzanê JOH û POHî û rêxistinanê qirkerdişî bi hîşmendîya fetîhî hêrişê kurdan kerd.

HDPyî vat: ''Nê hêrişî çarçewa 'Planê Çinkerdişî' de ameyî kerdene û bêmabên dewam kenê. Nê xîretî  seba qirkerdişê sîstematîkî bîyî. Kurdî rixmê nê hêrişan ewro payan ser o yê û xoverdayîşê xo yê rûmetênî dewam kenê. Dewayanê derheqê nê hêriş û qirkerdişan de hema zî gamêke aver nêerzîyaye. Ma do qet nê dejê şarê ma xo vîrî ra nêkerê û nêverdê ke bêro vîrakerdene.''