Eke no kolonyalîzm nîyo çita yo? Seke verê cû ma uca ra derbaz nêbibî ma şîyêne. Ge ge rayîro tewr kilm ê dinya beno rayîro derg. Ge ge rayîrê gerîlayan benê rayîrê dergî. Ma rayîrî ra resenê cayêke. Tabelayêka bi nuşteyê 'Dewa Sure' ma pêşwazî kena.

Daran kokê xo verdayî, her çi bibî wele. Nê erdî seba tay kesan keye seba tay kesan zî bi gor. Dewijan keyeyê xo bi na herre viraşte, merdimê xo binê nê erdî de defin kerdî. Goristanê dewe zî vêşîyayo. Dewe seke pixarîyêka pîl a. Beno ke înan waştêne sey des hezaran hêrişê îşxalkeran bikerê. 100 rojî vîyartî. 100 rojan ra nata dejêk nêmend ke nê erd û nê merdiman nêdîyo. Camêrdêko kokim pêzê xo çarneno.

Vano: ''Kênaya mi, înan erdê ma roto. Wa çew keyeyê Barzanîyî efû nêkero!'' seba ke ma nê kokimî fam bikerê bi hezaran cumleyî lazim ê. Vatişê nê apî rîpelanê tewr raştikênan ê tarîxê Kurdîstanî de ca gênê û tarîx seserra 21. de newe ra nusîyeno.

Şarê Başûrê Kurdîstanî çi dî çi nêdî. ma ver bi kendalan şinê. Tîya de zî keyeyî estê. Tay mend ke hînî şewe biba. Saete yewendes a. Keşîfî dewam kenê. Nişka ra goşê mi de vengêk gerîlayan wurzneno, goşê kêran akeno, kamera lerzneno. Vanê 'Hê danê Bektorya ro.'

Çimê gerîlayan ê ciwanan sey ê mi ewnîyenê estereyan. Ma têna yew çi wazenê; wa çîyêk nêbo embazan rê. Gerîlayî vera teknîkê giranî yê dişmenî  xo pawenê. Mi no dîmen dî ke hema zî vîrê mi de yo; beno ke vîst helîkopterê skorsky û kobra Kela Şabanîke, warê Şehîd Kendal, Dûbişk, Firê Biyê, Boxaza Sipî, Koordîne serî ra şinê. 

Nika serra 2020î de warê hewt rengan ê Kurdîstanî de Heftanîn de 107 rojan ra nata gerîlayê HPG û YJA-Starî vera teknîk, xayîn û nokeran bi çalakîyan erdê Başûrî pawenê.