Hemşaredarê Rêya Armûşê  Azîm Yazcan o ke hetê qeyûmî ra wezîfeyê ci amebi xespkerdene 8ê teşrîna peyêne de amebi destbendkerdene û 11ê teşrîna peyêne de zî amebi tepiştene. Yacan reya verêne Zindanê Wanî de mendêne û dima ame berdene bi Zindanê Erziromî.

Yacan Erzirom de hîrê rojî hucre de mend û dima ame erşawitene koxuşê yewkesîye. Yacan muracatê zindanî kerd ke koxuş ra bêro vetene la muracatê ci ameyî redkerdene. Yacano ke zindan de hawaleyê qesawetî ravêrna ci rê televîzyon, rojname û kitabî nênê dayene.

Cinîya Azîm Yacanî Hatîce Yacan vizêr şîye pêvînayîş. Yacane îfade kerd ke 2 hewteyan ra nata nêno destûrdayene ke mêrdeyê ci çew bivîno û vat:

"Mêrdeyê mi çend rojan ra nata nan nêweno. Vizêr vat  ganî avûkatê ci cade ey zîyaret bikerê. Seba ke koxuşê tepişteyanê sîyasîyan de bimano zaf muracatî kerdî la pêro ameyî redkerdene. Ganî no kerdişê înan biqedo. Eşkera ya ke wazenê ma û hemşaredar zehmet biancê. Bi caardişanê zindanî wazenê ke ma ecîz bikê."