Hemsereka PJAKî Zîlane Vejîn serebûtanê peyênan ê Îranî ser o ANF reyde qisey kerd.

Qiseykerdişê Zîlane Vejîn ra beşêk wina yo:

''Awankerdişê Komara Îslamî ra dima mabênê DYA û Îranî de nakokîyê pîlî bîyî û no krîz heta nika dewam keno. Îranî serranê peyênan de zaf herêmanê Rojhelatê Mîyanênî de cagirewt. Îranî heta nika pare kerd ke vera DYA şer keno la no şerêko zaf stratejîk o. Îranî hêzê xo goreyê îdeolojîyê xo awan kerdî û pare kerd ke ê vera emperyalîzmî yê. Heta ewro zî na rewşe dewam kerd, alozîya mabênê Îranî û DYA bîye zêde.

Kiştişê Qasim Silêmanî û Ebu Mehdî Muhendîs zî seba Îranî derbêka pîle bîye. Ambargoyê DYA Îranî ser o zaf tesîr keno. DYA wazena Îran kontrol bikera. 

Çareserîye na ya ke ganî yewîya demokratîke û sîyaseto demokratîk bêrê awankerdene. Ma nê çîyî de israr kenê. Mudaxeleyê hêzanê teberî yê vera Îranî û Rojhelatê Kurdîstanî kaos pîl kenê. Paradîgmaya Neteweyê Demokratîkî eşkena nê kaosî çareser bikera.

Sîyasetê Îranî şar keno mîyanê krîzê sîyasî, ekonomîkî û kulturî. Her roje bi desan kesê muxalîfî yenê tepiştene. Îşkence, qirkerdiş, dardekerdiş, destbendkerdiş hînî bîyî normal. Şarê Îranî verê nînan sere wedareno, serwerîya rejîmî zî qels bena. Hînî şarê Îranî nê sîstemî qebul nêkeno. Waştişo verên ê şarê Îranî no yo ke qanûno bingeyî yê antîdemokratîk bêro vurnayene. Şarê herême mudaxelayanê teberî û ê hêzanê zereyî qebul nêkeno. Rejîmê Îranî goreyê esasê 'yew destûrê bingeyî û yew rejîmî' têgêreno.

Weçînayîşê Îranî çarçewa demokrasîyî de nîyê. Meclîs û weçînayîş nêeşkenê meseleyanê şarî çareser bikerê. Weçînayîşî bi hawayêkê demokratîkî nênê kerdene. Her weçînayîş de rewşa şarî xerab bena.

Eke kurdî û şarê bînî bibê yew û têkoşîn bikerê seba vurnayîşê rejîmî zî gamî do bêrê eştene. Şarê kurdî warê yewîya şarê Îranî de eşkeno bibo hêzêkê serekî. Şarê kurdî eşkeno bi rolê rayberîye têbigêro. 

Seba ke krîzê Îranî û mudaxeleyê teberî biqedê ganî qanûno bingeyî bêro vurnayene. Projeyê Neteweyê Demokratîkî eşkeno Îran de bêro kerdene. Demokrasî ra ber hêzêk nêeşkeno Îran bixelisno. Rejîmê Îranî 40 serr ê ke bi sîyasetêkê antîdemokratîkî wazeno Îran û Rojhelatê Kurdîstanî îdare bikero. No şar vera polîtîkayanê zulman û tedayan xo ver dano. Eke Îran demokrasîyê xo awan nêkero tedaya teberî do biba zêdêr. O çax zî no şar do bi destê xo vurnayîş bîyaro ca. Hêzê komelî hêzo tewr pîl o.''