Komeleya Paştdayîşî, Yewîye û Kulturî yê Hetkarîya Kesanê ke Merdimê Xo Vînî Kerdî (MEBYA-DER) derheqê cenazayan de ke aîdê gerîlayanê PKKyî yê û nêdîyayê keyeyanê ci, Goristanê Yenikoyî yê qezaya Rezanî yê Amedî de eşkerayîyêke daye çapemenîye. Endam û îdarekarê MEBYA-DERî û keyeyê Îsmaîl Dago ke gerîlayê PKKyî bi, beşdarê eşkerayîye bîyî.

Destpêk de Hemserekê MEBYA-DERî Şeyhmus Karadagî pare kerd ke tay keyeyî bi serran o ke nêeşkenê cenazaya xo bigêrê û vat: ''Keyeyî seba ke cenazaya domananê xo bigêrê muracatê dezgehan û selahîyetdaran kenê, pabeyê netîceyanê DNA vindenê. Keyeyî wazenê ke yew gorê domananê înan bibo. Ma veng danê vanê ke goranê ma ra destê xo bigêrê, cenazayanê ma parçe mekerê, cenazayanê ma morgan de meverdê. Cenazayanê domananê ma teslîmê ma bikerê.''

Cenazaya gerîlayê PKKyî Îsmaîl Dag (Cemşîd) zî  Goristanê Xerzanî ra amebî vetene û seba cigêrayîşî erşawîyaye Tipê Edlîyî yê Îstanbulî. Babîyê Cemşîdî Zekî Dagî zî eşkerayîye de qisey kerd û vat: ''Ma muracatê Serdozgerîya Bedlîsî kerd, ma seba testê DNA gonîye zî daye. Ma wazenê wa yew gorê lajê ma bibo û ma serê ci de dûa bikerê. Domanê ma goristanê bêkesan ê Kîlyosî de yê la ê bêkes nîyê. Hema zî netîceya testê ma yê DNA nêvejîyaye. Ma wazenê wa cenazaya ma bêra teslîmkerdene.''