Çolê Dewa Çalê ya herêma Omeryanî ya qezaya Nîsêbînî ya Merdînî de, dimayê şerê mabênê artêşa Tikrî û gerîlayan şewat vejîya. Şewat, her ke şino vila beno. Şewato ke heta çolanê dewanê  Xerabê Bava, Stîlîle, Ziving û Kurikê Stîlîlê vila bîyo, eskerê Tirkî nêverdanê ke ekîbê îtfayan, hemwelatijê herême şorê cayê şewatî û şewatî hewn a bikerê. Artêşa Tirkî, ekîbê îtfayan û hemwelatijî tehdît kerdî ke cayê xo ra nêlewîyê.

Şarî vengdayîş kerd: Ganî her kes bêro tîya

Hemwelatijê herême ke bi îmkananê xo cehd kenê ke şewatî hewn a bikerê, hetê Artêşa Tirkî ra yenê astengkerdene. Şarî da zanayene ke her ke şino şewat vila beno û ganî mudaxele bêro kerdene, nêbo cayê ciwîyayîşî şewatî ra zirarêko gird vînenê.  Hemwelatijanê herême vengdayîş bi hîsgêran kerd û vat, “Destê kamî ra çi yeno ganî bikero. Ganî her kes çi keweno dest bigêro bêrê tîya. Esker nêverdano ke ma şewatî hewn a bikerê. Tîya de zaf hewcedarîya ma bi zerrîwazan esta.”