Hêrişê vera dewanê Amedîyê de şewat vejîya, keyeyî bi temamî vêşayî
Bombardumanê dewleta tirke ya îşxalkere ra dima herêma Amedîyê ya Başûrê Kurdîstanî de dewêke de şewat vejîya. Banê dewijan şewat de bi temamî vêşayî.
HÊRIŞÊ VERA BAŞÛRÎ
Dewleta tirke ya îşxalkere Başûrê Kurdîstanî de dewan raşta raşte kena hedef û sûcanê şerî kena. Xîret yeno kerdene ke dewijî bi zorî erdê xo ra bêrê vetene.
Roja yewşemeyî saetanê şewe de dewê Sergelê, Kevne Mêzê, Mêzê, Guherzê û Belave yê qezaya Amedîyê yê Dihokî bi SÎHAyan dîyayî bombayan ver.
Hêrişan de merkezê dewanê Kevne Mêzê û Mêzê yê herêma Berê Garê zî ameyî hedefkerdene, tay keyeyî bi temamî ameyî vêşnayene. Nêzanîyeno ke bombarduman de zerar resayo ganê çewî yan ney.
Dewleta tirke ya îşxalkere menganê peyênan de bi hezaran leşkerî û bi seyan wesayîtê zirxînî berdî herême û herême de baregehê leşkerî û noqtayê kontrolî awan kerdî. PDK zî nê kerdişan de ardimê dewleta tirke kena.
