Endama Meclîsê Partî yê PJAKî Hêvî Dêrik bîye meymana bernameyêkê Aryen TVyî û tay ercnayîşî kerdî. Qiseykerdişê Hêvî Dêrik ra beşêk wina yo:

''Komployê 15ê Sibate vera pêro merdimîye bi. Çunke Rayber Apo têna şexsêk nîyo o bingeyê felsefeya cuya azadîye ya pêro şaran o. Dima ke Rayber Apoyî PKK rona Rojhelatê Kurdîstanî de zî têkoşînê kurdan geş bi. Komployê 15ê Sibate ra dima zî şarê Rojhelatê Kurdîstanî wayîrê tewir û fikranê Rayber Apoyî vejîya û seba azadîya ey xîret kerd. Ronayîşê PJAK, KJAR, KODAR û Hêzê Pawitişê Rojhelatê Kurdîstanî YRK vera komployî cewabêko pîl bi. Embaze Vîyane Soran bi vatişê 'Xo vîr a mekê, meverdê vîr a şoro' bedenê xo da verê adirî. Ma zî pê nê şîarî wayîrê Rayber Apoyî vejîyê. Wayîrvejîyayîşê Rayber Apoyî wayîrvejîyayîşê nasnameyê ma yo.

Îran tedayanê xo dewam keno û îradeyê şarî binpay keno. Rejîmê Îranî maneno rejîmê Erdoganî. Rejîmê Îranî bi taybetî vera cinîyan polîtîkayanê xurtan keno. Çunke rejîm cinîyan ra terseno û pê tedayan keno ke cinîyî bêveng bibê.  Bi taybetî Rojhelatê Kurdîstanî de cinîyî tim hedefê rejîmê Îranî de yê. Rejîm nêverdeno cinîyê ma perwerde bivînê, waranê bînan de xo bimojnê.

Seba ke komelê Rojhelatê Kurdîstanî û Îranî bieşko xo sîstemê îqtîdarî û qirkerdişî ra bixelisno ganî rayberîya cinîyan de têkoşîn bikero. Seba cinîyan xelisîyayîşî ra ber çare çin a. Ganî cinîyî xo rêxistin bikerê û vera rejîmîe tewrê têkoşînî bibê. Têkoşînê cinîyan do yewîya komelî ser bivisno.''