Hemşaredarê Kampa Multecîyan a Şehîd Rûstem Cûdîyî (Mexmûr) Bedran Pîranîyî û Hemsereka Meclîsê Şarî yê Demokratîkî yê Kampa Mexmûrî Pakîstane Bîlen derheqê ambargoya vera Mexmûrî de ANFyî rê qisey kerd.

Hemşaredarê Kampa Multecîyan a Şehîd Rûstem Cûdîyî Bedran Pîranîyî da zanayene ke PDK di serrî yo vera înan ambargo ano ca û vat: ''Zehmetîyê ney zaf ê. Ne karkerî eşkenê şorê Hewlêr de bixebitê, ne ma sey şaredarîye eşkenê hetkarîye bigêrê. Ma sey şaredarîye pêro xizmetan pê hetkarîya şarê xo kenê. Hêvîya ma pê PDK yan zî hukmatê Herême çin a êdî, ma pê îmkananê xo ambargoyî pûç kenê. Ma hukmatê Iraqî reyde tay pêvînayîşan kenê û ma xîret kenê ke nê pêvînayîşan ra netîceyêke bivisnê destî. Ma PDK yan zî hukmatê Herême rê hînî çîyêk nêvanê. Ma venga şarê Başûrê Kurdîstanî danê ke zera zulmê serê multecîyan bêveng nêmano.''

Hemsereka Meclîsê Şarî yê Demokratîkî yê Kampa Mexmûrî Pakîstane Bîlen vat: ''2 serrî yo dewleta tirke û PDK kampa ma ser  o ambargo anê ca. Şarê ma bi taybetî hetê ekonomîkî ra zaf zehmet anceno çunke nêeşkeno têna kampe de kar bikero. Reyna babeta weşîye de destûr nêdîyeno şarê kampe şoro nêweşxaneyanê bînan. Bi desan cinîyanê diganan semedo ke nêşîyê nêweşxane dergûşê xo vînî kerdî. Wendekarî zî kampe de seke heps ê, nêeşkenê şorê zanîngehan û dibistananê bînan. 28 serrî yo dewleta tirke hêrişê ma kena. Heyf ke tay hêzê kurdî hetkarîya dewleta tirke kenê. Bi taybetî PDK kerdişanê Tirkîya têna seyr kena. PDK waştişê Tirkîya ser o vera ma amabargo ano ca. La şarê kampe wayîrê îradeyî yo û ma do têkoşînê xo rê dewam bikerê. Ganî kurdî hînî yewîya xo awan bikerê. Ma venga pêro kurdan danê ke wa wayîrê kampe vejîyê.''