Dima ke dewleta tirke 2015 de reya dest pê şerê kurdan kerd şarê Vakurê Kurdîstanî verê xo da Başûrê Kurdîstanî. La kurdê Vakurî tedaya PDKyî ra nêeşkenê debarê xo bikerê. PDK berê Hewlêrî multecîyanê Vakurê Kurdîstanî rê padano la kesanê fuhuşker, kiştox û xebatkaranê îstîxbaratî rê akeno.

Nê hemwelatîyî hetê PDKyî ra erşawîyayî Kerkûk û Silêmanî, sînorî ra teber ameyî kerdene, neçare mendî ke koçê Ewropa bikerê.

PDKyî 17ê temmuza 2019î ra nata vera Kampa Mexmûrî ambargo keno. PDK seke dişmenê ci yê kurdanê Vakurî rê têgêreno. Qedexe yo ke kurdê vakurî dekewê Hewlêrî. PDK nêverdeno nêweş û wendekaran şorê Hewlêr û kesanê ke şino Hewlêr tepişeno. 2 mengan de di kesê ke tepişîyabî merdî.

PDKyo ke Hewlêr û Dihok multecîyanê kurdan rê girewto sûcdarê edlîyî, îstîxbaratê tirkan bi rehetî dekewenê nê şaristanan. Nê kesî Dihok de cayê bi nameyê Ewro City de manenê û dima ya uca de manenê yan zî erşawîyenê Hewlêrî.

Polîsê bi nameyê Mustafa Ateşo ke serra 2017î de Mersîn de pê çeke lajê endamê verênî yê Meclîsê Şaredarîye Cengîz Duzgunî Volkan Duzgun kişt nê kesan ra yew o û Hewlêr de ameyo cakerdene. Ateş Famil Mallê Hewlêrî de xebitîyeno û goreyê Asayîşê Dihokî Ateş endamo aktîf ê îstîxbaratî yo.

Yasîn Atino ke rotoxê kondoxan û sûcdarê kiştiş û fuhuşî yo Îstanbulî ra şi Hewlêr. Atin zî Mehmet Babierî reyde xizmetê MÎTî de yo.