Çalakîya grevê vêşanîye ya Temsîlkarê HDP'yî ya ke Hewlêrî ya vera tecrîdê serê Rayberê Şarê Kurdî Abdullah Ocalanî ameya destpêkerdene roja 163’ine de bi qerardarîye dewam kena. Bi eynî amancî çalakîya Nasir Yagizî zî bi qerardarîye dewam kena. Herêm Mehmûdo ke qezaya Kelarî ya Germîyanî de 68 rojî yo vera tecrîdê serê Rayberê Şarê Kurdî Abdullah Ocalanî grevê vêşanîye yê bêdem û bêagêrayîşî de yo, şi serdana çalakwan Nasir Yagizî yo ke 163 rojî yo çalakîya grevê vêşanîye yê bêdem û bêagêrayîşî de yo.

Serdayîşî de Herêm Mahmûdî da zanayene ke, ey bi dîyayîşê Nazir Yagizî hêz girewto û vat, “Ez reyna heme xoverdayoxanê  ke xoverdayîşê grevê vêşanîye de yê silam kena û hemrayê ma yê ke kewtê rojeyê mergî zî bi rêzdarî înan silam kena. Ma bi na çalakîya ma dorê Rayber Apoyî de biba xeleke û Rayber Apoyî zîndanê Îmraliyî ra do bivejê.  Ez vengdayîş bi temamê şarê Başûr, Vakur, Rojakewtena û Rojawanî kena ke çalakîya rojeyê mergî ra û çalakîyê ke seba wedaritişê tecrîde serê Rayberîye ameyê destpêkerdene ra wayîr bivejîyê.”

Çalakwan Nasir Yagizî ard ziwan ke, wexto ke ey heşnayo Herêm Mahmûd dest bi çalakîya grevê kerdo, hîsê wextê destpêkerdişî yê çalakîye newe ra hes kerdê û vat, “ Mi o wext zana ke xoverdayîşê ma do ser bikewo.  O wext mi va ke na çalakîya ke mi tîya de daya destpêkerdene, hemra Herêm Mahmûd Başûr de ci rê bi cewab.  Herem bi nê vinetişê xo mojna ke o îdeolojîyê Rayber Apoyî wayîr vejîyayo.”

Peynîya qisey kerdişê xo de Nasir Yagizî vengdayîş bi ciwananê Kurdan kerd û vat, “Ganî ma xoverdayîşî xurt bikerê û biresnê serkewtişî. Ez reyna xeyrameyîşê xo bi  hemra  Herêm Mahmûdî kena û vana serkewtiş do yê şarê Kurdî bibo û faşîzm bin bikewo. Hewlêr ra temamê çalakwanê ke nika grevê vêşanîye de yê, silamanê xo şawena û înan rê serkewtiş wazena.”