Heyetê Vakurê Kurdîstanî Silêmanî de semedê yewîya neteweyîye bi roşnvîran ame têhet. Qiseykerdişan de ame vatene ke semedê kurdan teberê yewîye de yewna rayîr çîn o û hêzanê sîyasîyî yê kurdan ra ame waştene ke wa berpirsîyarîya xo bîyarê ca.
Heyetê partîyanê sîyasîyan ê Vakurê Kurdîstanî yo seba ke bi şarê Başûrî derheqê yewîya neteweyîye de muneqeşa bikerî şi Başûr Silêmanî de eleqeya girde dîye.
Heyetî pêvînayîşê diyînî rayberîya Temsîlkarîya HDPyî ya Hewlerî de Silêmanî de kerd. Xeylêk hunermend, roşnvîr, nuştox, akedemîsyen û tesîlkarê partîyanê sîyasîyan û sazîyanê sivîlan tewrê ci bîyî. Bi nameyê heyetê derheqê girîngîya yewîya neteweyîye de ame qiseykerdene. Heme qiseykerdoxan ard ziwan ke kurdî ganî hêzê xo bikerê yew û pîya tê bigêrê. Reyna bale ameye antene serê hêrişê îşxalê vera Kurdîstanî ser û ame vatene ke kurdî têna bi yewbîyayîş eşkenê ser bikewê. Qiseykerdişan de ame vatene ke teberê yewîye yewna rayîrê kurdan çîn o û PDK, YNK û PKKyî ra ame waştene ke semedê yewîye berpirsîyarîya xo bîyarî ca.
