Fermandara YJA-Starî Gamze Laçîn (Ronahî Amara) a ke Dêrsim de dadîya xo ra bena, metropolanê Tirkîya Kocaelî û Îzmîr de bena pîl. Gamze Laçîn vera şîdetê babîyê xo yê vera dadîya xo sere wedarit û vera nê şîdetî têkoşîn kerd. Gamze Laçîn 2011 de Erzirom de beşdara gerîlayan bîye û 18ê tebaxa 2022yî de Başûrê Kurdîstanî de şehîd bîye.

Dadîya aye Sevîme Saglam derheqê têkoşînê kênaya xo de ANFyî rê qisey kerd.

Gamze Laçîn 1992 de Mersîn de dadîya xo ra bena. Gamze ciwanîya xo de Kocaelî de tewra xebetanê ciwanan bena. Gamze Laçîn domanîya xo de pê hîkayeya Terteleyê Dêrsimî, Kurdîstanî û têkoşînê kurdan bena pîl.

Sevîme Saglam îfade kerd ke ê Dêrsimî ra yê la koçberê Mûşî bîyê û vat: ''Terteleyê Dêrsimî de keyeyê ma koçê Gimgimî keno. Wexto ke ez 20 serre bîya pê zorî ez daya zewijnayene. Mêrdeyê mi tim dayêne mi ro. Wexto ke Gamze 16 serre bîye verê babîyê xo vejîyaye û vat ke a do nêverda o mi bikişo. Ez xêrê Gamze ra şîdetî ra xelisîyaya, ez musaya ke cinî ya. Gamze zaf cîya bîye û bieqil bîye. Eke ez ewro ciwîyena no xêrê Gamze ra yo.

Gamze tim tarîxê Kurdîstanî, têkoşînê kurdan ser o wendêne, nê çîyî meraq kerdêne. Gamze şaristanê faşîstî de raştê zehmetîyan ameyêne. Înan aye rê vatêne 'ti kurd a, elewî ya. Mîyanê ma de nêeşkena.' Rixmê ney zî Gamze nêtersaye û mekteb war nêverda. Rojêke mi rê telefon ame û ame vatene ke Gamze nêşina dersan. Mi sebebê ci pers kerd û înan vat ke Gamze hînî mîyanê têkoşînî de ya. Gamze bi nê hawayî 2011 de tewra gerîlayan bîye. Rojêke televîzyon de mi vengê aye eşnawit. Mi waştêne aye bivînê la teyna veng est bi.''

Dayîke Sevîme dîyar kerd ke Gamze tim Terteleyê Dêrsimî ser o persî pers kerdêne û gêrayêne nasnameyê xo. Dayîke Sevîme vat: ''Aye tim vatêne 'Ez do biba avûkate û heqanê şarê kurd3i bipawa.' Gamze seba ma azadîye bîye. Aye zaf waştêne ke şora Dêrsimî.''

Babîyê Gamze Laçîn Mehmet Laçîn 3ê êlula 2019î de verê bînaya HDPyî ya Amedî de tewra ê keyeyanê ke îdîa kenê ke domanê înan hetê PKKyî ra ameyê remnayene bibi. Gamze Laçîn koyan ra venga babîyê xo dabi û vatbi:

''Şexsê babîyê mi de ê keyeyî wa hînî domananê xo verê dişmenî de qij mekerê. Ez bi bira xo û îradeyê xo tewra têkoşînê azadîye bîya. Rûmetê xo mevisnê cêrî. Sere de babîyê mi wa ê keyeyî kerdişê şima ne kurdayetî ya ne zî merdimatî ya. Kerdişê şima îxanet o. Ez sey yew elewîya kurde pê hişmendîya kulturê heq, xoverdayîş û edaletî bîya pîl. Nê îxanetî layîqê xo mevînê. Pê kayanê dişmenî mexapîyê.''