Alî Kanîroj, Xemgîn Amed û Helgurt Bagok şaristananê cîya-cîyayan ê Kurdîstanî ra bîyî û koyanê Kurdîstanî de ê raştê yewbînan ameyî. Destê înan de çeke û kamera pîya bîyî.

Mehmet Reşît Turgut, 1985 de dewa Şîşemzînî ya Geverî de dadîya xo ra beno. O domanîya xo de tedaya dewlete vîneno, dibistananê dewlete de rîyê dewlete yê raştikênî vîneno. Mehmet Reşît dima PKKyî û Rayber Apoyî şinasneno. O wexto ke Wan de zanîngeh wendêne tewrê xebatan beno û 2005 de agêreno dewa xo. O çax museno ke 2 gerîlayî şehîd bîyê û pê hêrsê ney bi nameyê Alî Kanîrojî Zagrosan de tewrê gerîlayan beno. Alî Kanîroj  Zap de perwerde vîneno û dima Merkezê Qerargehê HPGyî ra derbazê Merkezê Îrtîbatî û Çapemenîye yê HPGyî beno. Alî hînî embazê xo Arjînî reyde seba ke raştîyan biresno şarê xo xîret keno. Alî koyan de Xelîl Dagî ra perwerdeyê kamera vîneno.

Xebatanê çapemenîye ra 4 serran dima Alî Kanîroj şino Akademîya Apollonî û uca ra zî destanê ci de kamera û çeke derbazê Botanî beno. O Botan de pê kameraya xo qeyd keno û beno fermandarêko serkêş. 5 serran ra dima narey Alî Kanîroj şino Herêmanê Pawitişî yê Medya û perwerdeyê Akademîya Mahsum Korkmazî ra dima Merkezê Îrtîbatî û Çapemenîye yê HPGyî de cagêno. O beno gerîla û fermandarêko nimûne.

Xemgîn Amed (Yildiray Arslan) Amed de dadîya xo ra beno. O binê tesîrê polîtîkayanê qirkerdişî de beno pîl û keweno peyê cigêrayîşan. Yildiray peynîya nê cigêrayîşan de têgêrayîşê azadîye şinasneno û tewrê xebatan beno. Xemgîn dima bi qerardarî 2013 de tewrê gerîlayan beno. Xemgîn Amed Metîna de perwerdeyê verênî vîneno û Akademîya Çapemenîye ya Gurbetellîye de çapxaneyê Azadî de xebatan keno. Dima o Qendîl de Komîteya Şehîdan de xebatan keno. Xemgîn 2016 de derbazê Xakurkê beno û narey xebatanê leşkerîyan keno. Xemgîn Amed zî Akademîya Apollonî de perwerde vîneno û Merkezê Îrtîbatî û Çapemenîye yê HPGyî (HPG-BÎM) de Alî Kanîroj reyde xebatan keno. 

Helgurt Bagok (Celal Ozluk) Nisêbîn de dadîya xo ra beno û hema domanîya xo de têgêrayîşê azadîye şinasneno. Helgurt ciwanîya xo de vera polîtîkayanê înkar û îmha yê dewleta tirke tewrê xebatan beno û dima zî 2014 de verê xo dano koyanê azadan. Helgurt Bagok zî koyan de tewrê xebatanê çapemenîye beno. O, Alî Kanîroj û Xemgîn Amed seba ke gerîlayê azadîye yê Kurdîstanî derbazê tarîxî bibê destê înan ra çi yeno kenê. Helgurt Bagok beno gerîlayêko qerardar û samîmî.

Raywanê raştîye Alî Kanîroj, Xemgîn Amed û Helgurt Bagok hem karanê çapemenîye de, hem cuya xo ya gerîlatîye de embazanê xo rê bîyî serkêş û mîsal. Nê hîrê şorişgêr û merdimê esîlî 2018 de hêrişanê dewleta tirke ya barbare de tewrê karwanê şehîdan benê.