Şebekeya kiştişî ya dewleta Tirkî, hewteyo verên ra nata bi daweta fermî ya PDK'î Hewlêr de ya. Temsîlkarîya xo ya fermîye akerde. Sewîyeya heyetan de pêvînayîşê hemparîya ekonomî û kombîyayîşê girewteyî viraştî. Teyna PDK ney, aktorê bîn ê sîyasî zî destê xo da nê destê qilêrinî.

Seke yeno zanayene, Mesûd Barzanî her ke yeno serdana Enqera, serekê pêroyî yê Huda-Parî reyde zî merkezê MÎT’î de pêvînayîşan keno. Şîrketê bazirganîye yê ke merdimê Huseyîn Velîogluyî  hemkarê ci yê, ke Velîoglu awankerdayoxanê Hîzbulkontrayî ra yew o û bi desan endamê Hîzbulkontrayî yê keTirkîya de ci ra yeno gêrayene herêma PDK’î de binê asayîşê  Parastinî de wextêko derg o xebatanê bazirganî û sîyasî kenê. Nika zî cehd kenê ke Başûr de kemberêkê hemkarîye awan bikerê, ke no projeyêkê MÎT'î yo. Ma do bala xo bidê nê projeyî ser.

Bi serdana Wezîrê Karanê Teberî yê Tirkî Çavûşogluyî ya Hewlêr-Iraq-Kerkûkî reyde Huda-Par (etîketê qanûnî yê Hîzbulkontrayî) kewt mîyanê têgêrayîşî. Çapemenîye de pêvînayîşê PDK-Huda-Parî sey têkilîyê sivik ê sîyasî û bazirganîye ameyî dayene, labelê pêvînayîş xeylî xorîn bi. Sermayeya Hîzbulkontra (HAKSIAD) hetê PDK’î ra sewîyeya tewr berze de ameye qebûlkerdene. Bado zî serekê pêroyî yê Huda-Parî yo newe Îshak Saglam teba heyetêk 30'ê Nîsane de Mesûd Barzanî reyde pêvînayîş kerd.

1'ê Gulane de zî temsîlkarîya xo ya fermîye akerde. Wexto ke merdim bala xo bido ci hetkarîya ke ci rê ameya dayene û serdayîşê pîrozkerdişî, moderatorîya dewleta Tirkî û servîsê PDK'î baştir yeno famkerdene. Ê yê ke paştdayîş danê û pîroz kenê: Bizûtnewey Îslamî Kurdistan, Yekitî Niştîmanî Kurdistan, Tevgera Tirkmen a Serbixwe, Yekgirtûy Îslamî, Komela Îslamî Kurdistan, Partîya Demokratî Kurdistan, Partîya Îslam a Iraqî, Komeleya Darul-Beyan, Muessesa Ronakî, rîsipîyî, Yekîtiya Karsazên Kurdistanê, xeylî wezîrî, wekîlî, burokratî û bazirganî... 

PDK hetêk ra bi qerargehê ke pêşkêşê Tirkîya kerdê îşxalkerdişî Başûrî kena meşrû, labelê hetê bînî ra zî Hîzbulkontrayî rê ca akena, ke wasitayê şerê taybetî yo. Caverdişê Kerkûkî yê Cepheyê Tirkmenî rê, awankerdişê hêzê paramîlîter ê bi pereyanê Tirkîya û cehdkerdişê awankerdişê Hîzbulkontrayî sey awankerdişê mîsyonêkê eynî yê ENKS'î û meşrûkerdişî yenê şîrovekerdene. Kemberê xîyanetî yê hemkarî yo ke do dorê Şorişê Rojawanî bigêro, Başûr de zî bi destê PDK'î yeno cakerdene. Yeno vatene, yeno cehdkerdene ke wareyê stratejîk ê mabênê Rojawanî, Şengal, Mexmûr û Qendîlî bêrê padayene û bi nê hawayî yewbînan ra bêrê qutkerdene. Rayberîya Başûrî zî bi zerrî naye wazena. Coka mûxatabê pêşkêşkerdişê îmkananê Başûrî yê seba Hîzbûllahî PDK yo û moderatorê ci zî MÎT o.  Amanc zî kemberê xîyanetî yo.